Kryeministri Edi Rama, ka postuar disa foto të stadiumit Loro Boriçi në Shkodër pas rikonstruktimit dhe sipas tij, impianti do të jetë gati për ndeshjen zyrtare me Maqedoninë.
Rama thekson se “Loro Boriçi do të jetë gati edhe për ndeshjet e Kosovës, tashmë anëtare e FIFA-s dhe UEFA-s.
‘“Loro Boriçi’ i rilindur gati për kolaudim në miqësoren e 31 gushtit me Marokun dhe për ndeshjen e parë prej vërteti të Kuqezinjve me Maqedoninë në 5 shtator për eliminatoret e Botërorit 2018. Një stadium europian për Shqipërinë dhe Shkodrën, ku do të luajë eliminatoret e Botërorit edhe Përfaqësuesja e re e Kosovës.
Në këtë vepër është investuar nga Qeveria Shqiptare për futbollin, 18 herë më shumë se në 23 vjet (1990-2013) të marra së bashku”, shkruan Rama, por një komentues e kritikon pse ka vendosur ngjyrat kuq, blu dhe bardh që ndodhen edhe në flamurin serb.
Në fakt kuq e blu janë ngjyrat përfaqësuese të skuadrës së Shkodrës-Vllaznisë, po e bardha duket se është vendosur për dekor. Por ja që dalin yçkla të pakëndshme.
Këto gjëra duhen kujdes dhe jo penelata dekori.
Në fakt edhe Franca kuq, bardh dhe blu i ka ngjyrat e flamurit, por dikujt normal i shkon mendja te Serbia pasi gjuha vete ku dhemb dhëmbi. Sikur e bardha të mos ishte fare ndoshta do të ishin shmangur keqkuptimet. Thua vallë?! Ka gjasa që jo…
/tesheshi.com
