Deklarata e Edi Ramës në konferencën e shtypit të fundvitit mbi koalicionin me LSI ka qenë shumë e fuqishme dhe e thënë për herë të parë. Kryeministri deklaroi se koalicioni PS-LSI nuk do të varet nga fati personal i Edi Ramës dhe Ilir Metës. Një deklaratë që pritet të komtentohet në mënyrë eksplozive në ditët që vijnë por që realisht e shkarkon kreun e LSI nga një fuqi që ai e ka absolute në partinë e tij.
“Për mua, përgjigja është e qartë; partneriteti i PS-së dhe LSI-së nuk është partneriteti im me Ilir Metën. Ne jemi drejtuesit që i japim këtij partneriteti strategjik formën e koalicionit.
Është një domosdoshmëri shoqërore për vendin për të pasur dy parti dhe një forcë të madhe progresive të qendrës së majtë që bën reformat që ka bërë, pastaj dallimet, defektet janë gjëra të cilat janë absolutisht të rëndësishme por nuk janë arsye për të vënë në diskutim partneritetin strategjik.
Aspaketet taktike janë të diskutueshme. Për ne nuk ka nevojë taktike të bëjmë sikur nuk duam, për LSI-në është taktikë e pranueshme por partneriteti për mendimin tim është përtej meje dhe Ilir Metës. Thelbi është që Shqipëria ka vuajtur kur kjo forcë ka qenë e ndarë.
Ka vuajtur Shqipëria. Ilir Meta mendon se koalicioni me PD-në ka qenë i suksesshëm, unë mendoj se ka qenë vuajtje për Shqipërinë, jo për shkak të LSI-së, e kundërta që thotë PD-ja. Ata nuk dinë të bëjnë shtet.
PD është një forcë që nuk ka raport të shëndetshëm me shtetin dhe i vetmi institucion është Sali Berisha, të gjitha të tjerat janë relative. Kjo është e vërteta. Më thoni një reformë reale që ka bërë PD në funksion të shtetit. Më thoni një sektor kur ne nuk gjetëm gërmadhat e mos reformimit”, deklaroi kryeministri.
/tesheshi.com/
