Kryeministri Edi Rama edhe nga SHBA i ka shtrirë dorën e bashkëpunimit opozitës, ndërsa ka theksuar se Shqipëria ka nevojë për të gjithë dhe vendi ka humbur shumë kohë me protagonizma. Sipas Ramës, klima politike në Shqipëri mund të ndryshojë dhe nuk mund të përjashtojmë asnjë rrugë.
Pas fjalimit në sesionin e 72-të të Asamblesë së Përgjithshme të OKB-së, Kryeministri Rama ka dhënë një intervistë për Zërin e Amerikës, nga ku ka vlerësuar çdo koalicion gjatë mandatit të parë qeverisës.
“Me 25 qershor është fapur një faqe e re. Ne shpresojmë që këtë faqe të re ta kthejmë në një ekonomi më të fortë, me më shumë punësim”, tha Rama.
I pyetur për koalicionin e kaluar me LSI, si dhe për premtimet e bëra në këtë mandat duke qeverisur të vetëm, Rama tha se nuk fajëson LSI për ato që nuk janë arritur në mandatin e kaluar, përkundrazi sipas tij LSI ka dhënë kontribut.
“Nuk do të thotë se ne kemi fajësuar subjekte te veçanta, unë e kam vlerësuar koalicionin për atë që ka bërë me reformat. Vota e 28 qershorit tregoi se është hapur një faqe e re dhe ne do e shkruajmë këtë faqe me dinjitet, me shërbime dinjitoze për shqiptarët”, tha Rama.
Kryeministri është pyetur edhe në lidhje me aksionin për prishjen e ndërtimeve në Shkozë, por ai është shprehur se nuk mund të komentojë nga Nju Jorku situatën atje. Gjithsesi Rama theksoi se të bësh shtet dhe ti shërbesh qytetarëve nuk ka shumë rrugë. Ai i qëndroi vendimit për prishjen e ndërtimeve pa leje, duke pohuar se ato nuk do të legalizohen dhe as kompensohen.
“Shkoza nuk përfaqëson asgjë dhe nuk meriton asnjë koment nga Nju Jorku. Ata që kanë ndërtuar pa leje do tu prishen ndërtesat. Patjetër që nuk pranohet që as të dëmshpërblehen dhe as të ledhatohen. Familjet do të akomodohem me mundësitë e tyre. Shteti ka detyrë tu shërbejë qytetarëve. Të bësh shtet të bësh punë dhe të bësh mirëqenie nuk ka shumë rrugë”, tha Rama. /tesheshi.com/
