Kryeministri Edi Rama ka dhënë një intervistë në të përditshmen më të madhe serbe “Blic” ku thekson se mbështet nismën e presidentit Aleksandër Vuçiç për të zgjidhur problemin e Kosovës nga Beogradi, ndërkohë ka kundërshtuar iniciativën e zv.kryeministrit Ivica Daçic për të ndarë Kosovën.
“Iniciativa e Vuçiç për nisjen e dialogut të brendshëm për Kosovën është një akt i lidershipit me të cilin ai shpalosi një vizion kurajoz për të ardhmen e Kosovës dhe Serbisë.
Kam respekt për iniciativën e tij që të ballafaqohet me të kaluarën në mënyrë frontale dhe jokonvencionale”, deklaroi Rama.
Por cila është zgjidhja më e mirë sipas Ramës për Kosovën? “Njohja e plotë e Republikës së Kosovës nga Serbia! Por, e di se kjo është më e lehtë të thuhet sesa të bëhet. Prandaj, aktualisht zgjidhja është që të punojmë fuqishëm së bashku me durim dhe qetësi”, deklaroi kryeministri shqiptar.
Ndërkaq, Rama foli edhe për deklaratat e ministrit të Jashtëm të Serbisë Daçiç për ndarjen e Kosovës dhe akuzat për “krijimin e Shqipërisë së Madhe”.
“Zhurma rreth deklaratës për ‘bashkimin e Shqipërisë me Kosovën’ ishte një konkluzion trivial, e jo një plan, kërcënim apo dëshirë. Por, nëse mbyllet horizonti i integrimit të rajonit tonë në BE nuk është e vështirë të parashikohet rizgjimi i fantazmave nga e kaluara” tha Rama.
Duke kundërshtuar hapur qëndrimin e Ivica Daçiçit, kryeministri Rama deklaroi prerë e qartë se “nëse niset nga ndarja, kjo nuk i ndihmon zgjidhjes dhe natyrisht e lë çështjen të papërfunduar.
Vetë Daçiç, në një intervistë për televizionin publik serb ka deklaruar se pret ndihmën e Moskës për të mbështetur nismën e tij, që ka në thelb ndarjen e veriut të Kosovës dhe krijimin e enklavave autonomike në jug, duke krijuar kështu precedentin e një “Republika Srbska”.
Daçiç ka kërkuar thirrjen e një “Dayton” të ri për Kosovën, si modeli i Bosnjës.
/tesheshi.com/
