Edi Rama emëron Shkëlqim Hajdarin, njeriun që është përplasur me kryeprokurorin Adriatik Llalla si kryeinspektor të qeverisë.
Vendimi sapo është marrë dhe posti parashikon një detyrë të fuqishme që deri pak kohë më parë e mbante Ilir Zela, i cili u dorëhoq pas kërkesës së Ramës.
Prokurori që dha dorëheqjen si pasojë e përplasjes me Llallën dhe një vit më parë ishte përplasur dhe fizikisht në mbledhjen e shoqatës së prokurorëve, është një emër i njohur i drejtësisë, pasi ka qenë edhe pjesëtar i ekipit që hetoi vrasjen e Azem Hajdarit.
Emërimi i Hajdarit duket se është edhe pjesë e aleancës së Ramës me FRD-në e Bamir Topit, pasi dihet marrëdhënia e ngushtë e prokurorit me ish-presidentin e Republikës.
Por burime pranë mazhorancës e shohin Shkëlqim Hajdarin edhe si kandidaturë e mundshme për drejtor të Byrosë Kombëtare të Hetimit.
Shkëlqim Hajdari ka qenë një ndër kandidaturat për Kryeprokuror, këtu 10 vite më parë, pas largimit të Dhori Sollakut, por që nga Berisha u përzgjodh Ina Rama, e cila do cilësohej prej tij si “Silvia Konti”, derisa përfundoi në “lavire bulevardi” nga retorika e ashpër politike e pas-“21 janarit”. /tesheshi.com/
