Kryeministri shqiptar ka dalë pas takimit të zhvilluar me liderin e opozitës, Lulzim Basha dhe kreu i Kuvendit, Ilir Meta, me një dilemë që e ka përforcuar për herë të parë publikisht.
“Reforma në drejtësi mund të sjellë një ndarje dramatike në vend”, ka thënë Rama, i cili duke replikuar në distancë me Ilir Metën ka thënë se nuk ka zgjidhje tjetër përveç reformës.
Rama e ka cilëuar reformën si revolucion dhe sipas tij, “nuk ndodh gjithnjë që një revolucion i vonuar të jetë objekt i një diskutimi kaq të madh përballë një muri shurdh që synon me çdo kusht ta pengojë këtë revolucion paqësor dhe transformues për gjeneratën tjetër dhe të tjerat”.
“Kjo është reforma më e rëndësishme dhe vetëm pak ditë na ndajnë nga një moment deri tek i cili unë do të shpresoj deri në minutën e fundit se do të arrihet bashkimi i të gjithëve për t’i celur rrugën këtij transformimi, por që mund të jetë edhe momenti dramatik për një ndarje të re”, ka deklaruar Rama.
Duke bërë identikitin e aktorëve të kësaj ndarjeje, Edi Rama tha: “Mes atyre që janë të vetëdijshëm përse janë në Parlament dhe atyre që po bëjnë çmos për të mos e lejuar këtë transformim kolosal, ne kemi qenë, jemi dhe do të jemi deri në fund të vendosur që t’i hapim rrugë këtij revolucioni dhe të mundësojmë që Shqipëria të ndahet nga një epokë e karakterizuar nga mungesa e drejtësisë, kultura e pandëshkueshmërisë dhe pamundësia e njeriut të zakonshëm për të gjetur të drejtën në një derë gjykate”. /tesheshi.com/
