Në Ukrainë ka nisur procesi i formimit të një njësie të quajtur “Legjioni Ndërkombëtar për Mbrojtjen Rajonale” dhe është menduar për vullnetarët e huaj që duan të luftojnë kundër sulmit rus në këtë vend.
Në një deklaratë të Zyrës së Presidentit të Ukrainës thuhet se sulmi rus nuk është thjesht një pushtim i Ukrainës, por fillimi i një lufte kundër Evropës dhe rendit juridik botëror.
Presidenti Volodymyr Zelensky u bëri thirrje të gjithë qytetarëve të botës dhe miqve të Ukrainës që të mbrojnë vendin e tij dhe Evropën nga agresioni rus.
“Ne tashmë kemi mijëra kërkesa nga të huajt që duan t’i bashkohen rezistencës ndaj pushtuesve rusë dhe të mbrojnë sigurinë botërore nga regjimi i Putinit,” tha Hanna Maliar, zëvendësministrja e mbrojtjes e Ukrainës.
Zyra e Presidentit theksoi se të gjithë të interesuarit mund të kontaktojnë atashetë ushtarakë të ambasadave të Ukrainës në vendet e tyre.
Letonia dhe Danimarka po dërgojnë vullnetarë
Seima (Kuvendi) i Letonisë, në një seancë të jashtëzakonshme, ka mbështetur urgjentisht ndryshimet në Ligjin për Sigurinë Kombëtare, në përputhje me të cilin qytetarët e Letonisë lejohen të luftojnë si vullnetarë në anën e Ukrainës, njoftoi agjencia lokale Leta.
Vullnetarët fillimisht do të duhet të regjistrohen në njësinë strukturore të përbërjes rezervë të Forcave të Armatosura Kombëtare.
Komisioni i Mbrojtjes mbështeti ndryshimet në ligjin për sigurinë kombëtare të përgatitura të dielën, tha sekretari parlamentar i Ministrisë së Drejtësisë, Juris Juras.
Danimarka do t’i lejojë qytetarët e saj të bashkohen me brigadat ndërkombëtare vullnetare që po formohen për të luftuar në Ukrainë kundër forcave ruse, tha të dielën kryeministrja Mette Frederiksen.
“Është një zgjedhje që çdokush mund ta bëjë. Kjo është e vërtetë për të gjithë ukrainasit që jetojnë këtu, por edhe për të tjerët që mendojnë se mund të kontribuojnë në konflikt”, tha Frederiksen.
“Nuk ka asgjë në shikim të parë që do të pengonte ligjërisht dikë që të shkojë në Ukrainë për të marrë pjesë në konflikt, nga pala ukrainase,” shtoi ajo.
Wagner – mercenarët e Putinit
Më shumë se 400 mercenarë rusë janë urdhëruar nga Kremlini për të vrarë presidentin ukrainas Volodymyr Zelensky në Kiev dhe për të likuiduar anëtarët e qeverisë së tij dhe për të përgatitur terrenin që Moska të marrë kontrollin e vendit, ka mësuar The Times. Media shton se ata tashmë “operojnë në Kiev”.
Grupi Wagner, një milici private e udhëhequr nga një prej aleatëve më të ngushtë të presidentit rus Vladimir Putin, fluturoi pesë javë më parë me mercenarë nga Afrika për të kryer këtë detyrë të përgjakshme. /tesheshi.com/
