Presidenti Thaçi ka kohë që ka paralajmëruar se do të bëj padi ndaj Serbisë për krimet e kryera në Kosovë gjatë luftës së fundit, por ende nuk ka bërë një gjë të tillë.
Kur do që vendosë për ngritjen e padisë, Thaçi tashmë ka edhe më shumë dëshmi në duar dhe mund të përdorë tri monografitë e botuara së fundmi nga Instituti për Hulumtime të Krimeve të Luftës.
Konkretisht botimet e Fejaz Drançollit, “Trashëgimia e shkatërruar në Kosovë 1998/99”; të Fetnete Ramosaj, “KUNDËR HARRESËS – Gjenocidi i Serbisë në Kosovë 1998-1999”; si dhe të Baki Svirca, “Plaçkitja dhe Shkatërrimi i Fondit Arkivor të Kosovës nga Serbia, para dhe gjatë luftës 1998-1999”.
Në këto tri botimeve me tekst dhe foto prezantohen masakrat që janë bërë në popullatën civile.
Për rëndësinë e tyre foli edhe zv.ministri në detyrë i Drejtësisë, Munir Basha, i cili tha se qeveria e ndërgjegjshme për këto viktima, me vetëdije të plotë themeloi Institutin për Hulumtimin e Krimeve të Luftës.
Kurse ushtrues i detyrës së drejtorit të Institutit për Hulumtimin e Krimeve të Luftës, Ismet Salihu, tha se çdo promovim i librit është i rëndësishëm për kulturën e një vendi, por se promovimi i librave që vënë në pah gjenocidin e shtetit serb mbi popullin shqiptar është i një rëndësie të veçantë.
Saliu tha se me këto libra ruhet edhe kujtesa për të kaluarën e popullit të Kosovës.
Ndërsa ambasadori i Shqipërisë në Kosovë, Qemal Minxhozi, tha se është një aktivitet i një përmase jo të zakonshme që sjell në mendje gjithë shtresat e popullit të Kosovës ku paraqitet e gjithë ngjarja që ka ndodhur me popullin e pafajshëm të Kosovës.
Në emër të autorëve foli Fetnete Ramosaj, autore e librit “KUNDËR HARRESËS – Gjenocidi i Serbisë në Kosovë 1998-1999”, e cila tha se kur të bën padrejtësi dikush tjetër mund të ankohesh, por kur i bënë padrejtësi vetës gjërat janë më ndryshe.
Ajo tha se “kemi bërë pak për të zbardhur të vërtetën e gjenocidit që i ka ndodhur popullit kosovar.” Ajo ka apeluar tek drejtësia e Kosovës që të bëjë dokumentimin e asaj që ka ndodhur në Kosovë. /tesheshi.com/
