Nga: Mensur Krasniqi
Ngjarje historike për të gjithë shqiptarët anekënd botës është ndeshja mes Shqipërisë dhe Serbisë. Ja ku jemi sot të gjithë të bashkuar, me një dëshirë e një qëllim: “Fitore për kombëtaren tonë ndaj Serbisë dhe pjesëmarrje historike në EURO 2016 (Francë)”.
Nuk janë vetëm tifozët nga Shqipëria të përqendruar në ndeshjen e sotme. Me vëmendje të madhe po përcillet çdo gjë edhe nga shqiptarët në Maqedoni. Në kuadër të ndeshjes Shqipëri-Serbi, portali tesheshi.com ka realizuar një vështrim mbi këtë ndeshje edhe nga sportdashësit shqiptarë të Maqedonisë.
Kështu, kryeredaktori sportiv i Radio Televizionit të Maqedonisë, Mustafa Ademi, ka shpërfaqur frikën 
se tifozët nuk do munden ta ruajnë gjakftohtësinë, e se UEFA do t’i kthehet kësaj radhe kombëtares sonë me dënime të rënda, gjegjësisht me humbjen e 3 pikëve.
“Shpresa dhe dëshira ime më e madhe është të mos biem pre e provokimeve të kundërshtarit dhe ndeshja ta arrijë fundin e saj, qoftë edhe me rezultat jo të mirë për ne. Përndryshe, dihet shumë mirë se UEFA pa u lëkundur fare do të japë dënime shumë të mëdha për përfaqësuesen tonë. Shqipëria dhe lojtarët e saj duhet të jenë të qetë dhe në suaza të mundësive. Edhe pse e di fort mirë që është problem, ata duhet të hyjnë në këtë ndeshje si në çdo sfidë tjetër. E them që është problem më së pari pasi kundërshtari është i njëjti që i shkaktoi të gjitha ato trazira para një viti në Beograd, ndërsa, e dyta, fitorja eventuale në këtë ndeshje, bashkë me më së shumti barazimin e Danimarkës ndaj Portugalisë, do t’i sillte ekipit kuqezi pjesëmarrjen historike në EURO 2016,” deklaroi Mustafa Ademi.
Pasi për Federatën Shqiptare të Futbollit, si të gjithë kolegët e tij gazetarë nga Maqedonia, ishte i “padëshiruar” në “Elbasan Arena”, Mustafa Ademi ka vendosur që ndeshjen ta ndjekë në një ambient miqësor, me shoqëri.
“Ndeshjen do e përcjell bashkë me kolektivin dhe kryesinë e klubit të mundjes Liria, ku në palestrën sportive ‘Mentaz Allajbegu’ e kemi përgatitur një videoprojektor të madh, përmes të cilit do të orvatemi të krijojmë atmosferën e stadiumit. Shpresoj që diku rreth orës 22:45, të gjithë së bashku, në Shqipëri, Kosovë, Maqedoni, e çdokund ku jeton qoftë edhe një shqiptar, të dalim rrugëve dhe të festojmë fitoren dhe plasmanin historik në EURO 2016,” shtoi Ademi.
Ndërsa kryeredaktori i sportit në gazetën ditore “Lajm”, Reshat Ibrahimi, ka thënë se përveç ëndrrës shekullore për t’u kualifikuar në ndonjë europian futbolli, shqiptarët duhet të japin edhe provimin që të dëshmojnë kulturë të lartë sportive, për të treguar se jemi popull i civilizuar dhe europian.
“Patjetër duhet t’i përcjellim të gjitha këto mesazhe, ngase do të jemi në sytë e gjithë botës. Mendoj se në tribunat e stadiumit ‘Elbasan Arena’ do të mbretërojë festa sportive e futbollit, dhe në kuadër të gjithë kësaj do t’i ndihmojmë dhe do t’ua bëjmë edhe më të lehtë detyrën futbollistëve të kombëtares që të arrijnë qëllimin e dëshiruar,” shprehet Reshat Ibrahimi.
Ibrahimi foli edhe mbi rëndësinë e kësaj ndeshje, sepse me fitore do të kualifikoheshim direkt në Euro 2016, barazimi do ta zgjaste ëndrrën; kurse humbjen ai nuk e mendon fare.
“Mos të harrojmë se kemi edhe ca avantazhe të tjera. Kemi edhe një ndeshje me Armeninë, si dhe pjesëmarrjen në play-off. Forma e futbollistëve tanë më jep shpresë të madhe se do të fitojmë në këtë ndeshje historike. Dëshiroj të fitojmë ndaj Serbisë, sepse gëzimi do të ishte i dyfishtë. 8 tetori ditë historike, të festojmë kuqezi!”, tha Ibrahimi.
Ngjashëm me dy bashkëbiseduesit e lartpërmendur u shpreh edhe ish-futbollisti i reprezentacionit të Maqedonisë, Ertan Demiri. Ai nëpërmjet portalit tesheshi.com kërkoi si nga futbollistët, ashtu edhe nga tifozët, që të dëshmojmë vigjilencë dhe mençuri gjatë kësaj ndeshje historike, e kështu rezultati pozitiv s’do të mungojë.
“Duhet qetësi maksimale. Ky është moment historik që duhet shfrytëzuar. Futbollistët në fushë të jenë si
luanë, por me mendje të qetë. T’i tregojmë botës se shqiptarët janë popull inteligjent dhe se së bashku dinë t’ ia arrijnë qëllimit historik. Si në fushë, po ashtu edhe jashtë saj, duhet të jemi shumë vigjilentë. Ndërsa, sa i përket asaj se ku do e përcjell ndeshjen, do ta shoh atë me familjen time, dhe jam i bindur se do festojmë inshAllah,” lutet ish-futbollisti i njohur Ertan Demiri. /tesheshi.com/
