Kryeparlamentari, e njëkohësisht kryetari i LSI-së, Ilir Meta, do të ketë një takim sot me kryetarin e PD-së, Lulzim Basha, ku tema kryesore do të jetë reforma në drejtësi.
Edhe pse një ditë pushimi, kjo nuk i ka penguar dy politikanët e lartë që të lënë një pikëpjekje në Rogner në orën 11:00.
Takimi vjen pas një ftese të Ilir Metës dhe pranimit të saj nga Lulzim Basha, ndërsa politika shqiptare po përjeton orët më të nxehta në lidhje me reformën për drejtësi.
Kreu i PD-së pritet të shoqërohet në këtë takim nga Oerd Bylykbashi, e Ilir Meta të ketë në krah të tij Petrit Vasilin.
Edi Rama dhe Lulzim Basha dështuan në fillim të kësaj jave të gjejnë gjuhën e përbashkët për një reformë drejtësie të votuar në parlament në mënyrë të njëzëshme. Shefi i qeverisë ka kërcënuar me një dërgim për votim në parlament të paketës ligjore pa konsensusin e demokratëve. /tesheshi.com/
