Presidenti rus, Vladimir Putin nuk ka ngurruar të jetë ndër të parët që ka uruar presidentin e sapozgjedhur të Francës, Emmanuel Macron, edhe pse hetimet kanë dalë në përfundimin se hakerat që publikuan dokumentet sekrete të fushatës së centristit janë me lidhje me grupin që hakeroi zgjedhjet presidenciale amerikane, e që do të thotë, në një farë mënyre, me lidhje me Kremlinin.
Por, zyrtarisht, Kremlini thotë se Putin është shprehur i gatshëm për të punuar me Macronin në çështje dypalëshe dhe globale.
“Qytetarët e Francës ju kanë besuar udhëheqjen e vendit në një kohë të vështirë për Evropën dhe gjithë komunitetin botëror. Në kushte të tilla, është veçanërisht e rëndësishme të kapërcejmë mosbesimin reciprok dhe t’i bashkojmë përpjekjet për të siguruar qëndrueshmëri dhe siguri ndërkombëtare”, shprehet Putin.
Macron, gjatë fushatës së tij, ka thënë se do të bëjë përpjekje të punojë me presidentin rus, Putin, për të zgjidhur çështje rajonale si konfliktet në Siri dhe Ukrainë, por se përtej kësaj, “nuk beson se Franca dhe Rusia ndajnë të njëjtat vlera dhe prioritete”.
Kremlini dhe presidenti rus kanë qenë më të përfshirë në mbështetje të Marine Le Pen, rivales së Macron në zgjedhje. Nacionalistja e së djathtës ekstreme ka takuar Putinin gjatë fushatës dhe ka bërë thirrje për heqjen e sanksioneve të BE-së kundër Rusisë.
