Lëvizja Vetëvendosje edhe sot më 28 Nëntor në vazhdën e aktiviteve për kërkim të drejtësisë për aktivistin e tyre Astrit Dehari vendosi një pankartë të madhe me foton e Astritit dhe me një prapavi të kuqe që simbolizon flamurin kombëtar, në njërën prej ndërtesave në sheshin “Zahir Pajaziti” të kryeqytetit.
Ky baner është vendosur përballë të një baneri të së njëjtës madhësi, të presidentit të ndjer të vendit Ibrahim Rugova, ku tani këta dy banerë në mes e kanë heroin Zahir Pajaziti.
Me këtë rast, kreu i VV-së, Visar Ymeri, ka thënë se këtë 28 Nëntor ia kushtojnë Astritit.
“Këtë ditë që po e shënojmë, kur shqiptarët e shpallën veten komb dhe shtet, ne do të ia kushtojmë aktivistit tonë Astrit Dehari”, ka thënë Ymeri.
Ndryshe, Astrit Dehari vdiq më 5 nëntor derisa po qëndronte në burgun e Prizrenit si një prej të dyshuarve për sulm ndaj objektit të Kuvendit të Kosovës. /tesheshi.com/
