Presidenti i Maqedonisë së Veriut, Stevo Pendarovski, tha se nuk është i kënaqur me procesin aktual të integrimeve evropiane të vendit të tij, duke pasur parasysh se vetëm pas 17 vitesh pritje të statusit kandidat, fillojnë negociatat për anëtarësim në Bashkimin Evropian.
“Bashkimi Evropian praktikisht na ka harruar”, tha Pendarovski në një intervistë për agjencinë turke të lajmeve Anadolia, duke shtuar se Shkupi, me ndihmën e presidencës franceze, arriti një kompromis me Bullgarinë, e cila bllokoi integrimin e Maqedonisë së Veriut në BE për shkak të mosmarrëveshjet historike.
“Megjithatë, nëse shikoni prapa, ne kemi qenë me status kandidat që nga viti 2005 dhe, edhe pas fillimit të negociatave, askush nuk mund të thotë se kemi qenë shumë të suksesshëm në këtë drejtim”.
Duke theksuar se kjo pritje nuk është rezultat i mungesës së reformave, por se ka pasur shumë pengesa, Pendarovski tha se disa vende evropiane nuk janë të interesuara për rajonin e Ballkanit.
Shtetet e harruara
“Bosnja dhe Kosova janë vende absolutisht të harruara, absolutisht të harruara. Kosova nuk mund të marrë liberalizimin e vizave. Dhe çfarë euroentuziazëm dëshironi në atë popullatë, për Bashkimin Evropian?!”, tha Pendarovski.
Duke kujtuar se Mali i Zi dhe Serbia kanë dhjetë vjet që negociojnë anëtarësimin në BE, ai theksoi se të gjitha vendet e Ballkanit Perëndimor janë në pritje të avancimit drejt Bashkimit Evropian.
“Bosnja është vendi që objektivisht vuajti më shumë nga shpërbërja e ish-Jugosllavisë, me më shumë viktima, më shumë se 100 mijë të vdekur […], më shumë se dy milionë të zhvendosur. Ajo, për shkak të kontradiktave të brendshme të njohura, nuk mund të përparojë. Mirëpo, edhe Evropa, për shkak se disa shtete janë më afër njërës, të tjerat me një entitet tjetër, nuk ua zgjat dorën aq sa t’i nxjerrë nga humnera që po i afrohen”, tha Pendarovski.
Presidenti i Maqedonisë së Veriut tha se si pasojë e kësaj situate po largohen të rinjtë nga i gjithë Ballkani, duke shtuar se asnjë vend sot nuk ka aq banorë sa 20-30 vjet më parë. /tesheshi.com/
