Lufta politike në Kosovë, ka bërë që aktorët politikë t’i hapin letrat e së shkuarës njëri-tjetrit. Së fundi, në shënjestër është kryeministri Isa Mustafa, njëherësh dhe kreu i LDK-së, të cilit po i kërkohet llogari në lidhje me 3-përqindëshin e famshëm, pjesë e “Fondit për Kosovën”, një shumë e mbledhur para lufte përgjatë saj, e cila llogaritet në 50 milion marka. Ka qenë Behgjet Pacolli ai që së fundi i është drejtuar Mustafës që të japë llogari për këtë shumë, meqë ky i fundit e ka pohuar ekzistencën e një shume të tillë të mbetur pas luftës.
Postimi i Pacollit:
Fondi (fondet) i (e) 3%
Kohët e fundit po lexoj për 3%. Është mirë që po shkruhet dhe që po flitet për këtë çështje shumë të ndjeshme.
Pas mbarimit të luftës, unë kam parë një intervistë të Z. Fatmir Sejdiu dhe Z. Isa Mustafa, ku ky i fundit deklaron se nga (në) fondi(n) e 3% kanë mbetur edhe 50 milion marka gjermane.
Është e drejta e të gjithëve ta dimë se ku mbetën ato fonde, duke ditur se ato fonde janë të popullit e sidomos të mergatës, po edhe të miat dhe familjarëve të mi.(sic)
Por nuk është vetëm çështja e “Fondit për Kosovën”. Jo pak herë, në momente të nxehta politike, politikanët kosovare nisin e i kërkojnë llogari njëri-tjetrit për afera të errëta e po ashtu dhe për vrasje të mbetura enigmë, deri dhe dhjetra vite më parë, siç është ajo e vëllezërve Gërvalla. /tesheshi.com/
