Dritan Abazoviç, shqiptari që është bërë zëdhënës i opozitës filoruse në Mal të Zi, deklaroi se të gjitha partitë opozitare do të bojkotojnë parlamentin kur të miratohet vendimi për hyrjen e Malit të Zi në NATO.
Vetëm Partia Socialdemokrate, një forcë që garoi së bashku me opozitën, ka njoftuar se do të marrë pjesë në seancën e Kuvendit të Malit të Zi në rastin e votimit për NATO-n, çka nga zyrtarët e kësaj partie ishte paralajmëruar edhe më herët.
Për dallim nga partitë e tjera që janë deklaruar kundër integrimit në NATO, Lëvizja Qytetare URA, që drejtohet nga Dritan Abazoviç, deklarativisht shprehet pro integrimeve, por kryetari shqiptar ka deklaruar se nuk do ta përkrahin votimin në Kuvend nëse nuk sigurohen zgjedhjet e reja.
Nga ana tjetër, koalicioni “Shqiptarët e Vendosur” dhe nënkryetari i Kuvendit nga radhët e këtij koalicioni do të votojnë për integrimin e mirëpritur nga të gjithë shqiptarët.
Kryeministri i Shqipërisë, Edi Rama, gjatë vizitës së tij të fundit në Ulqin, në një intervistë për Tv Teuta deklaroi se shqiptarët për të dytën herë e shpëtojnë Malin e Zi.
Njëherë duke votuar pavarësinë, dhe në rastin e dytë me përkrahjen e integrimit në NATO, duke iu referuar koalicionit “Shqiptarët e Vendosur”. /tesheshi.com/
