Kryetari i PAA-së, Agron Duka, është i vetmi aleat i Bashës që ka vendosur të dalë më vete në zgjedhje dhe jo si “shtojcë” e listës së kandidatëve demokratë. Si u pre në besë nga Rama dhe nga Basha gjatë karrierës së tij politike…
Agron Duka, një biznesmen që iu fut politikës gati aksidentalisht, ka një profil atipik në spektrin e politikës shqiptare. Ai e koncepton politikën si një “besëlidhje” mes burrave, por për fatin e tij të keq i është dashur të zhgënjehet shpesh. Së fundmi ai i qëndroi fort besës së dhënë kreut të PD-së, Lulzim Basha për të qëndruar bashkë në opozitë, edhe pse nuk ishte dakord me të kur refuzoi paketën e parë “McAllister” të marrëveshjes.
Por, pas marrëveshjes Basha-Rama, Dukës dhe burrave të tjerë që i qëndruan PD-së në krah deri në vendimin radikal për të bojkotuar zgjedhjet, iu ofrua një “kockë” nga pakti i madh: futja e emrave të tyre në listën e PD-së dhe “shkrirja” e partive të tyre për hir të maksimalizimit të votave nën siglën blu.
Në këto kushte, Dukës i mbetet që të bëhet një ushtar i thjeshtë në listën e PD-së ose të masë forcat e tij në elektorat me partinë që drejton. Ai ka zgjedhur të dytën.
Pse Duka doli nga rreshti opozitar
Kreu i PAA-së i rezistoi ofertave që i bëri Rama me shkues Fatos Nanon, mikun e tij të hershëm, i cili e pati futur në politikë. Gjatë gjithë kohës që opozita qëndronte në çadër dhe pa u regjistruar në zgjedhje, i vetmi aleat i Bashës që miklohej nga e majta ishte Duka. Por ish-ministri socialist në kohën e Nanos vendosi t’i qëndronte “besëlidhjes” opozitare duke vlerësuar më shumë fjalën e burrit se sa taktikat politike të momentit.
Por ndodhi ajo që nuk priste: marrëveshja e bërë nga Basha penalizonte partitë e vogla aleate, duke mos u dhënë mundësi të futen në koalicion parazgjedhor me PD-në.
Në këmbim Basha u ofroi vende të sigurta në lista krerëve të partive të vogla, me kusht që ato mos të kandidonin vetëm.
Burime nga negociatat e Bashës me aleatët bëjnë të ditur se Duka i kërkoi 3 vende të sigurta në lista duke pretenduar se ka elektorat të paktën në tre qarqe të ndryshme. Refuzimi i Bashës po e çon atë drejt futjes vetëm në zgjedhje dhe një afrimi sërish me PS-në. “Pas zgjedhjeve jam i hapur të bëj koalicion me Partinë Socialiste”, tha ai.
Tradhëtia e dytë e Bashës ndaj Dukës
“Unë gjykoj se fjala e dhënë është e rëndësishme në politikë dhe me këtë nuk do të them, që nuk ka kompromise politike, por në fund të fundit duhet të ketë disa rregulla loje. Jo njerëz të cilët gjatë gjithë backgroundit të tyre politik vetëmë kanë gënjyer se pse kjo i prish të gjitha rregullat e lojës”.- thotë Duka, të cilit i është dashur të përballet me mungesën e “besës’ shpesh në politikë.
Historia e tij në politikë është një histori prej “fjale burri”, të cilën ai e ka parë se nuk funksionon në mënyrë të duanshme. Dhe pse nga një familje e djathtë, në vitin 2001 ai pranoi ofertën e Fatos Nanos për të kandiduar në Shijak si i pavarur i mbështetur nga PS-ja dhe fitoi. U bë ministër i Bujqësisë duke ruajtur miqësitë nga e djathta dhe duke vijuar të ketë mbështetje në elektoratin e djathtë dhe pse ish-kreu i PD-së Sali Berisha e akuzonte nga selia blu si “Duka i krimit” apo “Klani i Zemunit”.
Pas ardhjes së Ramës në PS atij i ofrohet nga kreu i ri që të bëhej pjesë e strukturave të PS-së për të vijuar karrierën në këtë parti, por Rama nuk e kandidon për deputet në vitin 2013 duke bërë që të ikte nga PS-ja drejt Partisë Republikane.
Në zgjedhjet vendore të 2015-ës i bëhet ofertë nga Basha për të kandiduar nën siglën e PD-së në Durrës përballë Vangjush Dakos. Duka pranoi, por Basha ndryshoi mendje pas konsultimit me Berishën.
Pak kohë më vonë, kreu historik i PAA-së, Lufter Xhuveli i bën ofertë që të marrë në drejtim partinë duke pasur parasysh dhe profilin e tij si njeri i sipërmarrjes në agro-biznes. Pas disa konsultimeve e pranon dhe nis riformatimin e kësaj partie, afron pranë saj biznesmenë të vjetër si Adi Haxhiymerim si kandidat në Tiranë, dhe ish-deputetë të PS-së si Marko Bello e Gazmir Bizhga.
Me modelin e njeriut babaxhan, që çfarë mendon e thotë, Duka ka vendosur që për herë të parë të provojë fatin i vetëm në politikë. Duke pranuar se i vetmi tipar që ka si politikan është sinqeriteti dhe se e di që kjo nuk pi ujë në politikë, tani po i hedh sytë për aleancat paszgjedhore, e cila mund të jetë me PS-në. Aksioma e tij është: “cila parti e madhe më garanton heqjen e akcizës së naftës në bujqësi, bëhet aleatja ime”. Ndaj nuk është çudi që ta shohim sërish krah Ramës pas 25 qershorit, duke i besuar kësaj here jo “fjalës së burrit” por “kompromisit politik”. /tesheshi.com/
