Presidenti gjerman, Joachim Gauck ka befasuar së fundi me deklarimin se edhe një musliman mund të bëhet si ai, pra president i Gjermanisë.
”Përkatësia në një besim të krishterë nuk është kusht paraprak për të përmbushur detyrën më të lartë shtetërore të vendit”, shtoi Gauck në një intervistë për shtypin evangjelist, i cituar nga radioja gjermane ”Deutschlandfunk”.
Gauck theksoi se ky rregull vlente edhe për ata që u përkisnin besimeve të tjera fetare si edhe ateistët.
Gauck, 76 vjeç, ka qenë pastor evangjelist gjatë kohës kur jetonte në ish-Republikën Demokratike Gjermane.
Mandati i tij si president mbaron vitin e ardhshëm dhe Gauck ka deklaruar se nuk do të kërkojë një mandat të dytë për shkak të moshës.
Ndërkohë, të tri partitë më të mëdha gjermane janë vënë në kërkim të presidentit të ri të vendit.
Në Gjermani, presidenti nuk ka ndonjë peshë politike të rëndësishme edhe është në kufijtë e një posti honorifik. /tesheshi.com/
