Ndeshjet do të luhen pa publik, pranë stadiumit do të ketë strehimore në rast rreziku ajror, të pajisura sipas të gjitha standardeve, në mënyrë që të gjithë në fushë të mund të strehohen shpejt dhe me siguri.
Kampionati ukrainas i futbollit do të fillojë më 23 gusht, por pa tifozë dhe stadiumet do të pajisen me strehimore në rast të një sirene sulmi ajror, njoftoi ministri ukrainas i Sportit, Vadim Guttsait.
Asnjë ndeshje e vetme nuk është luajtur në Ukrainë që kur Rusia pushtoi këtë vend në shkurt, kujton Reuters.
Takimet e fundit janë luajtur në dhjetor, pas së cilës klubet kaluan në një pushim dimëror tre mujor. Skuadra kryesuese ishte Shakhtar Donetsk me 47 pikë nga 18 ndeshje, ndërsa Dinamo Kyiv kishte dy pikë më pak.
Pas sulmit rus, kampionati u ndërpre dhe askush nuk u shpall kampion. Megjithatë, Shakhtar do të luajë në fazën e grupeve të Ligës së Kampionëve, ndërsa Dynamo Kyiv do të takohet me Fenerbahcen në raundin e dytë preliminar të Champions League. Shakhtar do t’i luajë ndeshjet në shtëpi në Varshavë, ndërsa Dinamo në Lodz.
Në një postim në Facebook, ministri i Sportit Guttsait njoftoi se kampionati do të fillojë më 23 gusht, kur festohet Dita e Flamurit Kombëtar të Ukrainës.
“Është shumë e rëndësishme të vazhdojmë të luajmë futboll, si dhe kampionate të tjera kombëtare, në Ukrainë. Ne vazhdojmë të garojmë dhe brohorasim. Ne vazhdojmë të luftojmë dhe të fitojmë. Sporti ukrainas do ta meritojë fitoren në të gjitha frontet dhe nuk mund të ndalohet të përparojë”, tha Guttsait. /tesheshi.com/
