Kroacia ka mbyllur 7 nga 8 rrugët e kufirit me Serbinë pas fluksit të madh të emigrantëve që hynë vetëm në një ditë nga mbyllja e kufirit hungarez, duke rezistuar kështu vetëm për pak kohë e duke bërë që refugjatët tashmë të gjenden të bllokuar.
Vetëm të mërkurën në Kroaci hynë mbi 10 mijë refugjatë dhe autoritetet thanë se e kishin situatën në kontroll, por nëse vijohej me këto shifra mund të ndryshonte edhe qasja e tyre.
Tashmë, rruga drejt destinacionit final për shumë refugjatë, Gjermanisë, është e bllokuar nga shumë shtete.
Situata humanitare në Kroaci është e vështirë për shkak se autoritetet nuk kanë mundur të strehojnë të gjithë ata refugjatë që hynë të mërkurën e një pjesë e mirë e tyre ka mbetur në rrugë e në tenda të përkohshme.
Liria e lëvizjes po zhduket në juglindje të Europës, thonë analistët. Sllovenia ndërpreu shërbimin e trenave që e lidhin atë me Kroacinë, pasi 150 refugjatë arritën në këtë vend me tren. /tesheshi.com/
