Kompania e mirënjohur e prodhimit të çokollatave “Mars” dhe “Snickers”, me 23 shkurt kërkoi tërheqjen e produkteve të saj nga 55 vende të ndryshme të botës, pasi në përbërjen e tyre është gjetur plastikë.
Ende nuk dihet një numri i saktë i sasisë që do të tërhiqet nga tregu, por theksohet se vetëm në Gjermani, kjo kompani prodhonte rreth 10 milionë çokollata në ditë.
Një zëdhënës i kompanisë ka bërë të ditur se kjo do të ishte tërheqja më e madhe e kompanisë që prej themelimit të saj. Ndërkohë, lajmërimi është dhënë edhe në ueb-faqen zyrtare, ku kërkohet dorëzimi i çokollatave pranë kompanisë si dhe moskonsumimi i tyre.
Ky vendim i kësaj kompanie ka alarmuar edhe Agjencinë e Ushqimit dhe Veterinarisë së Kosovë (AUV), e cila ka marrë të gjitha masat në lidhje me praninë e këtyre produkteve në treg.
Lamir Thaçi zyrtar për informim në Agjencinë e Ushqimit dhe Veterinarisë së Kosovë, ka thënë për tesheshi.com se kjo agjenci nga momenti i parë i marrjes se informatës për dyshimet të ngritura në përbërje në çokollatat “Snickers”, “Milky Way” dhe “Mars”, ka ngritur masat e nivelit të kontrollit.
“Është inspektuar përfaqësuesi importues i këtij produkti për Kosovë. I njëjti ka dërguar deklaratë me shkrim se artikujt të cilët janë të dyshimtë nuk janë në tregun e Kosovës dhe se artikujt e Snickers , Mars dhe Milky Way, që janë importuar në Kosovë janë të prodhuar në Holandë. Edhe pse artikujt të tillë në Kosovë nuk ka, Inspektorati Sanitar ka ndaluar përkohësisht edhe llojet tjera të këtij brendi të cilat nuk janë të dyshimta deri në verifikimin e saktë të prejardhjes së artikujve”, ka thënë Thaçi.
I pyetur se a është kontaktuar AUV nga ndonjë institucion apo kompani në lidhje me këtë çështje, ai ka thënë se “AUV, nuk ka informata zyrtare nga Sistemi i Alarmimit të Shpejt RASSF i BE-së, lidhur me informatën në mediet e shkruara dhe ato elektronike për çokollatën Snickers , Mars dhe Milky Way”.
Shqipëria ka tërhequr nga tregu çokollatat “Snickers”, “Milky Way” dhe “Mars”
Alarmit për tërheqjen e çokollatave në fjalë i janë përgjigjur edhe institucionet e Shqipërisë. Autoriteti Kombëtar i Ushqimit (AKU) në Shqipëri ka urdhëruar heqjen nga tregu të çokollatave “Snickers”, “Milky Way” dhe “Mars”.
Burimet zyrtare nga AKU thanë për Ora News se janë urdhëruar distributorëve që brenda 24 orëve të tërheqin nga tregu tre llojet e çokollatave që kanë datën e skadimit nga 19 qershori i vitit 2016 deri në 8 janar të 2017-ës.
Mars është një prej kompanive më të mëdha të prodhimit të çokollatave, e cila është themeluar në vitin 1911. Ajo prodhon një sërë produktesh përfshirë çokollatat “Mars”, “Milky Way” “Snickers”, “Twix”, etj./tesheshi.com/
