Edhe Kosova me vetting, me dekriminalizim, madje dhe me një SPAK. Kështu është vendosur në takimin e katërt mes VV-LDK, në parapërgatitje për krijimi e qeverisë së re të koalicionit, e cila pritet të udhëhiqet nga Albin Kurti.
Ka qenë Arben Gashi nga LDK ai i cili në një konferencë për shtyp bëri me dije vendimet e raundit të katërt të bisedimeve për përafrimin e programeve.
“Kemi diskutuar për sundimin e ligjit që ka të bëjë me gjykatat dhe prokuroritë. Folëm për vettingun, për dekriminalizimin dhe po ashtu folëm për çështjen e krijimit të një zyrë të veçantë që do të quhet Zyra Shtetërore e Hetimit.
Kjo zyrë do të ketë disa komponentë siç janë lufta kundër krimit të organizuar, hetimi i krimeve të vjetërsuara dhe sidomos krimeve politike, lufta kundër korrupsionit, dhe sundimi i ligjit në aspektin e antikorrupsionit dhe verifikimit të pasurisë së zyrtarëve të dyshuar.
Kjo zyrë ka nevojë ende për sqarime dhe për të parë a cenon sistemin kushtetues të Kosovës dhe a do të ketë ndryshime në ligje”, tha Gashi, duke shtuar se “për këtë zyre ende nuk kemi një qëndrim final”.
Në këtë kuadër, është diskutuar mes tyre dhe ajo që përfshihet te premtimet populiste, që në politikën e Tiranës, kryeopozitari Basha e promovon hera-herës me të madhe, e që është “marrja e parave oligarkëve, për t’ja shpërndarë popullit”.
“Ndër të tjera diskutuam edhe për ligjin për konfiskimin e pasurisë së paligjshme apo të paarsyetuar dhe u pajtuam që ky ligj të trajtohet dhe para se të marrim një vendim për të, u pajtuam që të përfshihet edhe Komisioni i Venecias në aspektin këshillëdhënës sepse kemi dyshimet tona për cenimin e të drejtave tek përzumimi i pafajësisë”, theksoi Gashi i LDK-së. /tesheshi.com/
