Edhe Greqia me halle shqiptare në plazhe: gjoba deri në 60 mijë euro…

Ministria e Ekonomisë dhe Financave e Greqisë njoftoi të hënën se inspektimet e para me dron kanë nisur për të identifikuar shkeljet e rregullave që rregullojnë përdorimin e bregdetit dhe plazheve, duke përfshirë të drejtën e aksesit të publikut.

 “Strategjia e re e ministrisë përfshin rregulla të rrepta dhe kontrolle intensive për të siguruar akses të lirë të qytetarëve në plazhe, përdorim transparent të pronës publike, mbrojtjen e mjedisit, promovimin e produktit turistik dhe respektimin dhe sigurinë e larësve”, njoftoi ministria më 25 maj.

Fluturimet e para me dron u zhvilluan më 24 maj në plazhet e Pefkohorit dhe Polikron në rajonin Halkidiki të Greqisë veriore, ku ka pasur shumë ankesa për akses, tha ministria.

Përveç fluturimeve me dron, ministria do të përdorë imazhe satelitore, dëshmi të qytetarëve përmes aplikacionit falas MyCoast, ku mund të paraqesin ankesa, si dhe inspektime në terren të organizuara nga disa dikastere.

Gjoba nga 2,000 deri në 60,000 euro janë parashikuar për pengimin e aksesit të lirë të publikut në bregdet dhe plazhe. Dënimet penale shqiptohen për ndryshime në mjedis.

Në mars, parlamenti grek miratoi një ligj të ri për përdorimin e pronës publike në zonat bregdetare. OJQ-të mjedisore e kanë kritikuar atë, duke thënë se lejon shfrytëzimin komercial të plazheve edhe në zonat e mbrojtura.

“Ligji i ri redukton ndjeshëm hapësirën e përbashkët publike të brigjeve tona dhe nuk jep garanci për mbrojtjen e ekosistemeve të ndjeshme dhe mbrojtjen e shoqërive nga kërcënimi aktual i krizës klimatike”, tha WWF Greqi.

Vitin e kaluar, grekët dolën në rrugë duke kërkuar kthimin e aksesit të lirë të publikut në plazhe, gjë që garantohet me ligj. Pjesë të mëdha të bregdetit janë të zëna nga kompani private që kufizojnë në mënyrë të paligjshme hyrjen në plazhe dhe shpesh marrin shuma të mëdha për marrjen me qira të shezlongëve.

Lëvizja protestuese, e ashtuquajtura “Lëvizja e Peshqirëve”, filloi në ishullin Rodos dhe u përhap në veri të vendit.

Ministria ka vendosur një procedurë të re për koncesionet në brigje dhe plazhe përmes një platforme të veçantë dixhitale. Deri më 31 maj pritet që të shpallen të gjithë tenderët e ankandeve elektronike për mbi 1200 koncesione, shkruan Balkan Insight. /tesheshi.com/