Edhe regjisori i njohur Gëzim Kame mbron idenë se ideja e prishjes së Teatrit Kombëtar ekzistues, për të ndërtuar një të ri në vend të tij, daton që në kohën e komunizmit.
“Problemi i një teatri të ri me sa mbaj mend unë ka filluar që në vitet ’70. Pothuajse të gjithë artistët e asaj periudhe, që nga Naim Frashëri, Kadri Roshi, Sulejman Pitarka, Pjetër Gjoka, të gjithë me radhe e kanë ngritur këtë problematikë. Sepse ajo godinë është e papërshtatshme, që në zanafillën e ndërtimit të saj, s’ka të bëjë me teatrin”, shprehet Kame për Shqiptarja.com.
Njeriu që prej vitesh është larguar nga TK e ka themeluar teatrin privat “Kame Teatër” në periferi të Tiranës, thotë se dhe ai, në vitin ’98, u angazhua së bashku me të tjerë artistë për një teatër të ri.
“Kjo është ngritur përsëri me të madhe në 1998-ën. Dhe aty kam qenë protagonist për këtë punë. Isha në pozicionin e drejtorit të përgjithshëm të Teatrit Kombëtar. Bëra një përpjekje duke krijuar një grup aktorësh me në krye Kadri Roshin, unë, Ndriçim Xhepa, Yllka Mujo dhe Agim Qirjaqi. Dhe e pashë që duhej larguar si problem nga politika. Atëherë patëm atë vizionin që më mirë t’ia lëmë Presidencës, ose Presidentit këtë problem sesa të merrej shteti. Kjo u ndërpre pastaj me ndërrimin e ministrave të Kulturës, ikjen e Arta Dades dhe ardhjen e Edi Ramës”, shprehet Kame. /tesheshi.com/
