Një ndër diplomatët europianë më të angazhuar me Shqipërinë por dhe më i pavarur në qëndrime karshi palëve, eurodeputeti i djathtë Eduard Kukan, është vënë krah kolegut të tij Johannes Hahn, për letrën e hapur drejtuar shqiptarëve, ku qartazi fajësonte PD-në për krizën dhe u bënte thirrje shqiptarëve që të shkonin e të votonin më 18 qershor.
“Mbështetje të plotë për Johannes Hahn dhe deklaratën e tij për qytetarët shqiptarë”, ka shkruar Kukan në statusin e vet në Twitter, si për të konformuar se dhe atij vetë i është sosur durimi nga përballja me politikën e Tiranës, posaçërisht me çadrën e opozitës.
Kukan është tashmë një figurë simbol e Bruskelit që përpiqet të negociojë krizat shqiptare. Ai vjen nga e djathta, por qëndrimet tij njihen si tejet parimore përballë palëve duke mos anuar në asnjë rast. Por tashmë edhe ai është detyruar të mbajë një qëndrim, siç është vënë re dhe në këtë status të tij.
Paradoksale në këtë rast është se më shumë se e majta europiane, është e djathta ajo që po përballet me PD-në dhe po sfidohet prej saj, duke i detyruar që të lënë pas gjuhën diplomatike për t’i përcjellë mesazhet me stilin e të thënit troç, ose ndryshe “pa dorashka”. /tesheshi.com/
