Mbretëria e Bashkuar do të rrisë numrin e trupave në misionin paqeruajtës ndërkombëtar në Kosovë mes shqetësimeve për vendosjen e trupave serbe në kufi.
Ministria britanike e Mbrojtjes ka njoftuar se do të dërgojë edhe 200 ushtarë shtesë për të përforcuar kontingjentin britanik, i cili përbëhet nga 400 ushtarë tashmë në Kosovë, në kuadër të stërvitjes vjetore.
“Zgjerimi i mbështetjes sonë për Forcën Paqeruajtëse të Kosovës (KFOR) nënvizon përkushtimin tonë të palëkundur ndaj NATO-s dhe sigurisë së Ballkanit Perëndimor”, tha Shefi i Shtabit të Mbrojtjes së Mbretërisë së Bashkuar, Tony Radakin.
Vendosja e forcave të reja vjen me kërkesë të aleancës së NATO-s.
Njësia e Ushtrisë Britanike iu caktua komandantit të forcave të NATO-s në Kosovë me kërkesë të veçantë të Komandantit Suprem të Aleatëve për Evropë, gjeneralit amerikan Chris Cavoli, njoftoi qeveria britanike.
Ky vendosje është një dëshmi e udhëheqjes dhe shkathtësisë së Ministrisë së Mbrojtjes të Mbretërisë së Bashkuar dhe do të sigurojë forcë dhe ekspertizë shtesë për NATO-n, si pjesë e angazhimit të palëkundur të Britanisë ndaj aleancës, thuhet në deklaratë.
Admirali Tony Radakin, Shefi i Shtabit të Mbrojtjes tha se vendosja e Batalionit të Parë të Regjimentit Mbretëror të Princeshës së Uellsit demonstron reagimin e Forcave të Armatosura të Mbretërisë së Bashkuar dhe se MB vazhdon të jetë një pjesë thelbësore e Aleancës së NATO-s, duke ndarë ekspertizën dhe forcën ushtarake.
“Zgjerimi i mbështetjes britanike për KFOR-in nënvizon përkushtimin tonë të palëkundur ndaj NATO-s dhe sigurisë së rajonit të Ballkanit Perëndimor,” vuri në dukje ai.
Nën komandën e NATO-s dhe duke punuar së bashku me forcat e vendeve të tjera aleate, forcat e Britanisë së Madhe do të jenë në dispozicion për të kryer operacione në përputhje me mandatin e KFOR-it për të ruajtur një mjedis të sigurt dhe lirinë e lëvizjes për të gjithë njerëzit në Kosovë, deklaroi Radakin.
Lidhur me njoftimin e Britanisë së Madhe se do të dërgojë rreth 200 ushtarë shtesë në KFOR, zëdhënësi i NATO-s, Dylan White, në një deklaratë tha se edhe aleatët e tjerë do të dërgojnë përforcime shtesë. /tesheshi.com/
