Federata argjentinase e futbollit ka arritur më në fund të gjejë një zëvendësues për Tata Martino-n në stolin e përfaqësueses. Ai është Edgardo Bauza, trajneri aktual i San Paulos.
Detyra parësore e trajnerit të ri do të jetë përpjekja për të rikthyer Lionel Messi-n të luajë sërish me Argjentinën. Për të vijuar me përgatitjet për ndeshjet e ardhshme kualifikuese për botërorin e ardhshëm.
Bauza duket të ketë qenë një zgjedhje e sforcuar e drejtuesve të federatës argjentinase, pasi më herët kanë qenë të parapëlqyer emrat të tjerë. Diego Simeone, Jorge Sampaoli dhe Marcelo Bielsa u pretendua të ishin piketuar si zëvendësues të Martino-s, por asnjëri prej tyre nuk e mori detyrën.
Trajneri i ri do duhet ta lërë pas vetëm tetë muajsh punën te San Paulo. Ai është i njohur në futbollin amerikanolatin, pasi ka drejtuar shumë skuadra dhe ka fituar me to dhe Kupën Libertadores.
Argjentinën e presin në shtator ndeshjet me Uruguajin dhe Venezuelën, të vlefshme për fushatën kualifikuese për Kupën e Botës të 2018-tës. /tesheshi.com/
