Në 25 gusht ushtria e Mianmarit depërtoi në veriun e saj të banuar kryesisht me myslimanët Rohingya, duke djegur fshatra, dhunuar gra dhe vrarë civilë.
Më shumë se 420.000 Rohingya kanë kaluar kufirin për të shkuar drejt Bangladeshit.
Kjo është shifra më e madhe e eksodit ndërkufitar të refugjatëve prej krizës së Ruandës, shkruan “Economist”.
Udhëheqësja e shtetit Suu Kyi dhe njëherësh fituesja e çmimit Nobel për paqe nuk ka përmendur me emër “Rohingya-t” dhe ka folur për krizën vetëm disa javë më vonë.
Por kriza me myslimanët daton nga 1982, kur qeveria e atëhershme i largoi ata nga lista e minoriteteve të njohura, ku gjithsej janë 130.
Ata u paraqitën si emigrantë ilegalë nga Bangladeshi. Prej atëherë Rohingya-t kanë mbetur pa shtet dhe keqtrajtimet ndaj tyre sa vinin e shtoheshin.
Në 1991-92 rreth 600.000 myslimanë kaluan kufirin për t’i shpëtuar dhunës e persekutimit ushtarak.
Në këto momente kriza ka qenë më e rëndë, ku 120,000 banorë kanë kaluar kufirin brenda javës. Kjo ka sjellë probleme me furnizimin me ujë, ushqime dhe kontrolle mjekësore.
Krahasuar me krizat e kaluara, kjo e sotmja mund të krahasohet vetëm me atë të Ruandës në 1994, kur 2.3 milion banorë u larguan nga shteti.
Në Siri janë larguar gjithsej 5.5 milion banorë, por kjo ka zgjatur brenda pesë viteve, që mesatarisht brenda javës është 33.000 persona.
Interesant është se në grafikun e medias britanike, jepen të dhëna edhe për refugjatët nga Kosova.
Gjatë disa muajve të luftës së Kosovës, janë larguar 900.000 banorë, që është më e larta mesatarisht pas Ruandës, Mianmarit, Irakut dhe Sirisë. /tesheshi.com/
