Pak gjëra në jetë mund të jenë po aq frustuese sa kur të aplikoni për një vizë ruse. Së pari ka një formë të pafundme: një listë të të gjitha vendeve që keni vizituar në 10 vitet e fundit me datat e sakta, detajet e punëdhënësve dhe menaxherëve të kaluar, historia e edukimit tuaj, numrat e sigurimeve… dhe lista është e pafundme. Pastaj duhet ta siguroni një ftesë zyrtare nga organizata që po vizitoni. Sikur kjo të mos jetë e mjaftueshme, duhet të gjeni një zyrë të vogël në skajin tjetër të qytetit për të marrë shenjat e gishtave. Në tërësi, procesi i kushtoi Gulliverit rreth një muaji të kohës së tij dhe gazetës The Economist një shumë të konsiderueshme parash.
Udhëtimi im në Shën Petersburg ishte për një natë të vetme.
Iu ankova në lidhje me këtë kolegut tim indian, i cili refuzoi të më ngushllojë. “Tani e kuptove se çfarë duhet të kaloj sa herë që hyj në Britani”, tha ai. E vërtetë. Ne britanikët marrim udhëtim pa asnjë problem. Sipas Indeksit të fundit të Kufizimeve të Vizave, të lëshuar muajin e kaluar nga Henley & Partners, një kompani për zhvendosje (relokim), unë mund të hyjë në 173 nga 218 vendet e botës (pa përfshirë vendin tim) pa vizë ose me vizë pas mbërritjes, krahasuar me vetëm 52 vende në të cilat kolegu im indian mund të hyjë (shumica e të cilave janë vende ishuj të largëta të Paqësorit ose të Karaibeve).
Britania ndan vendin e tretë, bashkë me dy shtete tjera në listën e Henley për pasaportat më të vlefshme në botë (shih tabelën). Gjermania vjen në vendin e parë. Qytetarët e saj mund të kenë qasje pa viza në 175 vende. Në skajin tjetër të listës, është pak e çuditshme të gjesh disa prej kombeve më të trazuara në botë, përfshirë Afganistanin, Sirinë dhe Somalinë.
Do të jetë interesante të shihet se në cilin drejtim lëviz bota kur është fjala për viza. Ndërsa më shumë shtete po miratojnë pasaportat biometrike, në teori do të duhej të ketë më shumë hapësirë për zbutjen e kufizimeve të mëtejshme. Dhe në përgjithësi, ndërsa ekonomitë e vendeve bëhen më globale, ato gjithashtu tentojnë të heqin kërkesat për viza për udhëtarët.
Gjatë dy viteve të fundit, për shembull, qytetarët e Emirateve të Bashkuara Arabe kanë qenë në gjendje të udhëtojnë pa viza në 45 vende më shumë se më parë, sipas Henley. Kjo përfshin zonën e Shengenit, një grup prej 26 kombesh evropiane që kanë hequr kontrollet e pasaportave, duke e bërë vendin e parë arab që u mundësohet një heqje e vizave evropiane.
Por, ndërsa BE po kërcet nën peshën e krizës së saj me emigrantë, edhe sa kombe më shumë do të kenë këtë privilegj në vitet e ardhshme? Nuk është vetëm Evropa që po tregohet shumë e kujdesshme në këtë aspekt. Amerika gjithashtu po shtrëngon programin e saj të lëshimit të vizave pas sulmeve terroriste në Paris, dhe atë, madje përpara mundësisë që vendi të zgjedhë një president anti-imigracioni si Donald Trump.
Mbajtja e pengesave për hyrje nuk është vetëm zhgënjyese për udhëtarët, por gjithashtu është e shkurtapamëse. Siç kemi shkruar më parë këtë vit:
Vizat janë një e keqe e domosdoshme. Ato u ofrojnë qeverive një mënyrë për të kontrolluar kufijtë e tyre, qoftë për të rregulluar qarkullimin e emigrantëve, ose për të zgjedhur ndonjë kërcënim të mundshëm ndaj sigurisë. Por dokumentet dhe tarifat që ato sjellin, në anën tjetër pengojnë turistë të ligjshëm dhe udhëtarë të biznesit. Hulumtuesit në Institutin Cato, një think-tank libertarian, mendojnë se eliminimi i të gjitha vizave të udhëtimit në Shtetet e Bashkuara do të shtonte midis 90 dhe 123 miliard dollarë në shpenzimet vjetore turistike. Sipas një vlerësimi, futja e kufizimeve të vizave mund të ulë investimet e drejtpërdrejta të huaja dhe në mes të dy vendeve deri në 25%.
Përgatiti: Jeton Zenuni – /tesheshi.com/
