Nga Blendi Gashi
Kreut të LDK-së, Isa Mustafës, aspak nuk po i pëlqejnë raportimet e mediave dhe kritikat që analistët politikë po bëjnë rreth listës së këtij subjekti për kandidatët që do të garojnë për pozitën e deputetit, në zgjedhjet e 11 qershorit.
Ai thotë se raportimet e shumta për LDK-në tregojnë qartë se partia e tij është “halë në sy” e atyre që u mbetet merak të vendosin për këtë parti.
“LDK manovra.. .LDK e shtyri në listë… LDK e nxori nga lista… LDK e LDK gjithnjë në trend. E… LDK vendos vetë! Shihet qartë se LDK është strumbullari i aktualiteteve, por edhe halë në sy e atyre që u mbetet merak të vendosin për LDK-në. LDK është gjithnjë një hap përpara! Më e demokratizuar, më e hapur, e pakorruptuar e aftë të qeverisë me vendin. Pikë”, ka shkruar sot Mustafa në Facebook.
Por në vend se të shpreh brengën e tij për raportimet e mediave dhe opinionet që bëjnë analistët, ai është dashur të tregoi nëse përzgjedhja e kandidatëve të LDK-së për deputet është bërë si ka dashur ai, apo mbi performancën që kanë pasur në legjislaturën e fundit ish-deputetët e tij, pasi në listë gjenden disa nga “memecët” e partisë, kurse në fund të listës apo jashtë saj kanë mbetur disa kundërshtarë të tij.
Mustafa duhet të tregoi ku është demokracia brenda partisë kur “kundërshtarët” e tij, si Shpetim Bulliqi, Fatmir Rexhepi, Adem Salihaj e Hatim Baxhaku, nuk u futën fare në listë.
Çfarë demokracie është kur deputetja më e votuar e partisë Vjosa Osmani, renditet në listë në vendin e 81-ta, kurse në vend të 9-të renditet e “përkëdhelura” e tij Vlora Dumoshi, e të 12-tin renditet Teuta Rugova (vajza e presidentit të ndjerë Ibrahim Rugova), e cila gjatë dy vite e gjysmë si deputete kujtohet vetëm kur ka thënë “Betohem”, dhe kur ka parashtruar një pyetje tejet të paqartë dhe duke ju drishur zëri për ministrin e Kulturës, Kujtim Shala.
Mustafa, poashtu duhet të tregoi se a mund të ec përpara LDK, kur njerëzit e saj që kontribuan jashtëzakonisht shumë për parti renditen më poshtë se disa persona të shoqërisë civile që së fundmi ju bashkuan partisë së tij.
Pra, të tregoi mbi çfarë vlerësimi të bërë, Ismet Beqiri, Kujtim Shala, Lumir Abdixhiku (i sapo aderuar në LDK), Fidan Rekaliu (kryetar i të rinjve të LDK-së), Imet Rrahmani, Lirije Kajtazi (kryetare e gruas së LDK-së), janë renditur në listë se akademiku Sabri Hamiti?
Andaj, derisa të mos japë një përgjigje për çështjet e ngritura më lartë, Mustafa duhet ta ketë të qartë se LDK do jetë “halë në sy”, për njohësit e rrethanave politike, pasi pyetja e tyre se a u ndërtua lista me inate dhe favore, është legjitime ?
Se LDK është strumbullari i aktualiteteve dhe se LDK vendos vetë (pra udhëheqësia e saj e jo analistët politik )këtu Mustafa ka të drejtë andaj, duke qenë si partia e dytë aktualisht më e madhe në vend, mediat dhe opinionit në përgjithësi i interesojnë zhvillimet brenda saj dhe kanë të drejtë të shprehin qëndrimin e tyre “pro et contra” çdo zhvillimi.
Kurse, sa i përket deklarimit të Mustafë s se “LDK është gjithnjë një hap përpara!”, kjo mbetet të shihet pas zgjedhjeve të 11-qershorit, ku do të mësohet fuqia e LDK-së, pra nëse vërtetë do jetë një hap para ndaj partive tjera, pra nëse do dalë triumfuese apo jo. /tesheshi.com/
