Vlora si dhe arti skenik shqiptar, përcollën nën lot e dhimbje për në banesën e fundit një ndër yjet e humorit, Muhamet Likon e Parodistëve të Vlorës, i cili humbi jetën pak ditë më parë në moshën 64-vjëçare nga një atak kardiak, teksa po bënte një kontroll të zemrës në Itali.
Dy kolegë të tij që u shkrehën në lot sapo u njoftuan për lajmin e hidhur, Afrim Agalliu e Agron Hamo, thanë se ikja e Metit ishte vërtet një humbje e madhe.
“Është një moment shumë i vështirë jo vetëm për familjen, por edhe për ne që punuam një jetë të tërë bashkë, 42 vite. Kjo është dhimbje e madhe për të gjithë artdashësit shqiptarë dhe këtë e kemi ndier këto ditë që Metin që nuk e kemi.
Meti do të mbetet një nga figurat më të shquara të humorit shqiptar, ai nuk i përkiste vetëm Vlorës, por humorit shqiptar. Metin nuk do ta kemi fizikisht, por do ta kemi në mendjen dhe zemrën tonë. Lamtumirë Meti i dashur. Meti e kishte emrin Muhamed dhe e iku natën e Kadrit dhe sot ditën e Bajramit e përcjellim. Dheu qoftë i lehtë”, tha Afrim Agalliu.
Ndërsa Agron Hamo u shpreh se Meti i përket të gjithë Shqipërisë më atë që ka bërë. “Ishte lezeti, kripa, njeri i mirë, familjar model. Nuk kanë të shteruar fjalët. Ky është Meti, kanë ardhur nga e gjithë Shqipëria. Është shumë e vështirë t’i thuash lamtumirë”.
Në ceremoninë e varrimit morrën pjesë figura të shquara të artit skenik shqiptar, që nga Mirush Kabashi, Zef Deda, Luftar Paja, Agron Llakaj etj. /tesheshi.com/
