Kreu i grupit parlamentar socialist, Taulant Balla, ka sqaruar ndryshimet e propozuara nga partia e tij në Rregulloren e Kuvendit, të cilat nga kahja jetër politike janë kuptuar si tentativë për të penguar arrestimin e ndonjë deputeti nga Prokuroria.
Sipas Ballës, gjithçka ka të bëjë me një rregullim juridik.
“Ndryshimet e propozuara në rregullore janë njoftuar prej shumë kohësh, që kanë të bëjnë me domosdoshmërinë e momentit. Kjo rregullore reflekton ndryshimet kushtetuese të bëra prej disa vitesh, ndryshimet kushtetuese të 2012, ato të 2016, ndryshimet e Kodit të Procedurës Penale dhe vendimeve të Gjykatës Kushtetuese”.
“Kjo ka qenë një kërkesë e hershme, nëse Kuvendi do të respektojë rregulloren apo Kushtetutën, si në rastin e deputetit Saimir Tahiri, ku nëse Këshilli i Mandateve do t’i referohej rregullores do të ishte gabim”, sqaroi Balla.
Më herët, kreu demokrat Basha akuzoi mazhorancën se me kërkesën për ndryshim rregulloreje, Rama kërkon të mbrojë deputetët nga arrestimi, siç ndodhi me Saimir Tahirin.
Në thelb, kërkohet që Prokuroria të ofrojë prova bindëse për çdo deputet nën akuzë, si shkak për prangosjen. /tesheshi.com
