Në faqen e Facebook-ut “Observatori Kombëtar Kundër Islamofobisë”, ka një reagim lidhur me një shkrim ku pretendohet se Presidenca Turke nuk ka respektuar kryeparlamentaren e Shqipërisë Lindita Nikolla, gjatë një takimi të kësaj të fundit me presidentin Erdogan. Si shkak merret fakti se aty nuk është flamuri shqiptar.
Por çështja është thjesht protokollare, siç sqarohet dhe më poshtë:
“Presidenti turk Rexhep Tajjip Erdogan priti të martën në kryeqytetin Ankara kryetaren e Kuvendit të Shqipërisë Lindita Nikolla. Takimi u mbajt me dyer të mbyllura në kompleksin presidencial dhe zgjati pothuajse një orë. I pranishëm në takim ishte edhe homologu i zonjës Nikolla, kryetari i Kuvendit të Turqisë, Mustafa Sentop.
Ndërkohë Syri.net ka përhapur dezinformata në lidhje me këtë takim, duke pretenduar se ka pasur thyerje të protokollit duke nxitur ksenofobinë dhe turkofobinë për arsye që vetëm ata i dijnë.
E vërteta është se protokolli ndryshon në varësi të natyrës së takimit. Në takime si ky, protokolli parashikon që Presidenti i vendit pritës të ulet në krye të vendit, ndërsa kreu i delegacionit të ulet në ulësen afër Presidentit, por jo në krah të tij (shikoni foton) përballë homologut të vet. Për këtë arsye, vendosen vetëm flamujt e vendit pritës. Ndërsa në rastet kur takimi është midis homologëve, apo ka natyrë tjetër, vendosen flamujt e të dyja vendeve.
Siç mund ta shihni nga fotoja, zonja Nikolla është në krye te delegacionit përballë homologut të saj turk (pra në nivel të barabartë pozicioni).
Prandaj, të pretendosh se ka mosrespektim nga ana e Turqisë për simbolet e Shqipërisë është jo vetëm e pavërtetë, por edhe pretendim qesharak. Shqiptarët që jetojnë në Turqi e konfirmojnë pa asnjë mëdyshje respektin e madh të Turqisë dhe popullit turk (pëfrshirë politikanët) për shqiptarët dhe Shqipërinë”, shkruhet nga Observatori Kombëtar Kundër Islamofobisë. /tesheshi.com/
