Donald Lu ka prej kohësh që nuk flet në publik. Hera e fundit ka qenë kur u përplas me Kryeprokurorin, Adriatik Lalla.
Ndërkohë ka ndërprerë edhe kontaktet me opozitën, që kur së bashku me ambasadorin e OSBE-së në Tiranë i ofroi Bashës një mundësi negocimi që të ishin ndërkombëtarët ata që do kontrollonin zgjedhjet e 18 qershorit, me kushtin që PD të niste zbatimin e Vetingut.
Por Basha u ngujua në çadër dhe më pas nuk ka pasur asnjë kontakt.
PD nga ana e saj, me anë të qarqeve të fuqishme mediatike pranë vetes dhe me “grupin e gatshëm” të rrjeteve sociale, e kanë sulmuar pa mëshirë Donald Lu-në, duke e quajtur si njeri të Soros, të Ramës, madje edhe e kanë shkarkuar disa herë virtualisht.
Por ambasadori amerikan i ka dërguar vetëm një mesazh Lulzim Bashës, ku i kujton favorin e rëndësishëm apo asetin politik që i dha më 21 korrik, pas një negocimi frenetik në prani të Romana Vlahutinit dhe Ilir Metës.
Pikërisht bëhet fjalë për kontrollin e procesit të Vetingut.
PD-ja ashtu si edhe PS ka të njëjtin numër deputetësh në tre komisionet parlamentare që zgjedhin anëtarët e Komisionit të Vetingut por edhe Kolegjit të Apelimit.
Pra bëhet fjalë për njerëzit që do të kalojnë në sitë dhe miratojnë se kush do të rrijë e kush do të vijë në sistemin e ri të Drejtësisë.
Natyrisht, pasi të shqyrtojnë një nga një të gjitha dosjet e ndërkombëtarëve, të cilët bëjnë vetëm argumentimin e fakteve dhe provave në lidhje me integritetin e gjyqtarëve dhe prokurorëve apo kandidatëve për poste të tilla.
Lulzim Basha përfundimisht siç dhe është bërë e qartë jo vetëm që nuk u kyç në proces, por edhe avancoi kërkesat e tij, duke bërë thirrje për ndryshimin e 7 ligjeve të Reformës, ku në radhë të parë është ligji i Vetingut, i cili ka kaluar të gjitha filtrat, që nga Gjykata Kushtetuese e deri te Komisioni i Venecias.
Ky duket se është pengu më i madh i ndërkombëtarëve, e në veçanti i Donald Lu-së, i cili i fali Bashës dy koncensione politike: ligjin e dekriminalizimit siç deshi PD-ja dhe kontrollin e Vetingut; gjithashtu bindi dhe Ramën që të pranonte variantin e PD. Dhe Rama u bind, kur tha që nëse do të bini dakord me SHBA-në e BE-në, ne jemi ok.
Por sot duket se gjërat kanë marrë një trajtë tjetër. Pikërisht, zhgënjimin e ndërkombëtarëve me Bashën e tha vetë eurodeputeti gjerman, Knut Fleckenstein, i cili i bëri thirrje PD-së që të “mos keqpërdorte shumicën bllokuese në komisionet e Vetingut”.
Dhe kjo është “nyja gordiane” e ngërçit.
Ramës në 2011-ën, pasi ia morrën bashkinë, u ul shkroi “Kurban”-in dhe i la protestat duke pritur zgjedhjet. Ky ishte stadi që u poq nga ndërkombëtarët.
Nuk dihet se si do të veprojë Basha në këtë rast, por negociatat do të jenë të vështira…/tesheshi.com/
