E veja e gazetarit të vrarë saudit Jamal Khashoggi u ka bërë thirrje tifozëve të Newcastle United që të kundërshtojnë propozimin e sauditëve për të marrë përsipër klubin e futbollit.
Një letër e hapur e shkruar nga Hatice Cengiz është një reagim ndaj lajmeve se grupi i investimeve, i cili financohet kryesisht nga Fondi Saudit i Investimeve Publike (PIF), i kryesuar nga Princi i Kurorës Mohamed bin Salman, është në prag të blerjes së klubit.
“Unë e di se shumë prej jush janë tunduar nga oferta e tij për të dalë nga situata e pafavorshme që ka paralizuar klubin për shumë vite. Por trashëgimtari i fronit akuzohet se ka urdhëruar vrasjen e Jamal (Khashoggi)”, ka shkruar Cengiz në Twitter.
Një investim prej 300 milion dollarësh
“Të gjitha hetimet e besueshme kanë treguar se ai është përgjegjës. Sidoqoftë, ai nuk po gjykohet në vendin e tij, sepse ai sundon me grusht të hekurt”.
Raportohet se një investim prej më shumë se 300 milion dollarë do t’i jepte grupit 80 përqind të aksioneve në ekipin anglez Premier League.
“Thirrja ime për ju është të merrni në konsideratë ofertën e Mohamed bih Salman, se a është me të vërtetë mënyra e duhur për të dalë nga një situatë e dëshpëruar për klubin dhe qytetin tuaj. Si mund të jetë kur klubi juaj kontrollohet nga dikush që duhet të gjykohet për vrasje ?”, shkruan e veja e Khashoggi.
“Ata vendosën për këtë veprim jo për hir të interesave tuaja më të mira, por vetëm për interesin e tyre.”
“Ju jeni tifozë besnikë dhe ju kërkohet të jeni të tillë. Por unë ju ftoj të gjithëve të bashkoheni dhe të mbroni klubin dhe qytetin tuaj të dashur nga Princi i Kurorës dhe ata rreth tij”.
Lajmi për një marrje të mundshme u prit pozitivisht nga disa tifozë, dhe disa prej tyre postuan flamuj sauditë si dhe foton e vetë princit në profilet e tyre në Twitter.
Gazetari i Washington Post Jamal Khashoggi u vra në kompleksin e konsullatës Saudite në Stamboll, ku ai shkoi në një takim të planifikuar në 2 tetor 2018, me qëllim që të merrte dokumentet e nevojshme personale për dasmën.
Pas disa ditësh mohimi, autoritetet saudite pranuan që Khashoggi u vra, dhe më pas një gjykatë në Arabinë Saudite dënoi pesë të ekzekutuarit me vdekje.
Tre të pandehurit e tjerë morën dënime me burg gjithsej 24 vjet.
Por bashkëpunëtorët e afërt të Bin Salmanit janë liruar nga të gjitha akuzat.
Komisioneri i Lartë i Kombeve të Bashkuara për të Drejtat e Njeriut, në një raport prej 101 faqesh, pretendon se vrasja e Khashoggi ishte një veprim i paramenduar nga Arabia Saudite.
Raporti thotë se ka prova të vlefshme për nevojën për të hetuar përfshirjen e zyrtarëve të lartë sauditë në atentat, përfshirë dhe vetë Bin Salman. /tesheshi.com/
