E veja e një prej viktimave të 21 janarit, pikërisht e Aleks Nikës, i ka kërkuar dy eurodeputetëve të ngarkuar me Shqipërinë, Eduard Kukan dhe Kurt Filckenstein, që BE të bëjë presion që të dalin fajtorët e vrasjes së 4 personave përpara Kryeministrisë në vitin 2011.
Siç bën të ditur Top Channel, një ditë përpara mbërritjes në Tiranë të eurodeputetëve Kukan dhe Fleckenstein, Rajmonda Nikaj u ka shkruar një letër eurodeputetëve ku thekson se kërkon të takohet me ta.
Ajo shprehet se i ka shuar shpresat për të gjetur drejtësi për bashkëshortin e vrarë, ndaj dhe i ka hedhur shpresat nga ndërkombëtarët.
“Me sinqeritet dëshiroj që Ju ta dini se më shumë se kurrë, me shumë dhimbje, tashmë çështja jonë nuk është një prioritet”.
Rajmonda Nika u shkruan eurodeputetëve se ajo e shikon ngjarjen jo thjesht si një çështje të familjes së saj.
Në fund të letrës, Rajmonda shpjegon se ajo do ta çojë përpara betejën, që mban emrin “Drejtësi për Aleksin”, e jo vetëm për atë.
“Kanë kaluar 5 vite dhe kërkesa ime, tanimë nuk bëhet për Aleksin që e humba. Por e bëj këtë për vajzat e mia, për të ardhmen e tyre, sepse unë dua që ato të jetojnë në paqe dhe në një vend ku ka drejtësi”.
Në përgjigjen e tij, eurodeputeti Eduard Kukan thotë: “Siç edhe jeni në dijeni, unë kam bërë gjithnjë thirrje për një investigim të plotë të kësaj ngjarjeje tragjike. Unë me të vërtetë besoj se drejtësia do të triumfojë në këtë çështje. Po ashtu, me sinqeritet besoj se vajzat tuaja do të ndihen se jetojnë në një vend demokratik dhe me liri, ku drejtësia është në shërbim të qyetetarëve”, shprehet Eduard Kukan. /tesheshi.com/
