Nga Blendi Gashi
Ndonëse kanë ikur pesë ditë nga vdekja e aktivistit të Lëvizjes Vetëvendosje, Astrit Dehari, i cili ndërroi jetë në qendrën e paraburgimit në Prizren, shtetin e ka kapluar heshtja.
Edhe pse gjatë këtyre ditëve është dashur të ndodhin një varg dorëheqjesh ose suspendimesh, nuk ka ndodhur as një e vetme, dhe kjo tregon se politikanët kosovarë mjerisht as rastet më tragjike nuk i lëkundin nga kolltuket e tyre të cilat u sjellin shumë të mira materiale.
Vdekja e një të riu derisa qëndronte në burgjet e Kosovës, e që përgjegjës padyshim është shteti pasi menaxhon burgjet, dhe mos dhënia e përgjegjësisë deri më tani nga asnjë politikan, tregon paturpësinë e vërtetë të pushtetarëve që akti i dorëheqjes për ta është një gjë e panjohur, që është dëshmuar që nga paslufta.
Përgjegjësia për vdekjen e paqartë të Astritit pikësëpari duhet adresuar politikisht, pra nuk është e nevojshme që të pritet autopsia përfundimtare, që udhëheqës të institucioneve të dorëhiqen e suspendohen.
Pse po hesht kryepolici Shpend Maxhuni, pas deklaratës skandaloze të drejtorit të policisë në Prizren Nexhmi Krasniqi?
Njeriu i parë që do të duhej të largohej pas vdekjes së Astrit Deharit padyshim është drejtori i policisë së Kosovës për rajonin e Prizrenit, Nexhmi Krasniqi, i cili pak orë pas vdekjes së aktivistit të VV-së deklaroi se “Astriti ka vdekur nga mbidoza e medikamenteve”, gjë që më pas është demantuar nga kryeprokurori i Prizrenit, Sylë Hoxha dhe pas autopsies s që i është bërë të ndjerit.
Por çuditërisht edhe pas pesë dite Krasniqi vazhdon ta ushtroi detyrëne drejtorit, pra as nuk ka ofruar dorëheqje as nuk është larguar nga drejtoria e përgjithshme e policisë për deklaratën skandaloze.
Por shtrohet pyetja, një deklaratë të tillë e bëri Nexhmi Krasniqi krye në vete apo i telefonoi dikush nga lartë?
Deri më tani kjo pyetje nuk ka përgjigje.
Pyetja tjetër është pse po hesht drejtori i përgjithshëm Shpend Maxhuani? Pra, pse drejtoria e policësisë së Kosovës nuk e tha asnjë fjalë për vdekjen e Deharit që pas deklaratës së Krasniqit?
Duke parë deklaratën e tillë të papërgjegjëshme përveç Krasniqit dorëheqje gjithësesi se është dashur të ofroi edhe drejtori Maxhuni, njëherit të kërkohet përgjegjësi prej tyre.
Po ministri Skender Hyseni pse nuk e thotë asnjë fjalë?
Njeriu që institucionalisht është më i fortë se Maxhuni e Krasniqi është ministri i brendshëm Skender Hyseni. As ky lëre që nuk bëri një akt moral siç është dorëheqja, por nuk e tha asnjë fjalë të vetme për vdekjen e Astrit dhe për deklaratën e pamatur të institucionit të policisë.
Duke parë këtë heshtje të plotë të Ministrisë së Brendshme dhe policisë së Kosovës për vdekejn e Deharit, pyetja që në vazhdimësi do të kërkoi përgjigje është: kush dha urdhër për deklaratën skandaloze të bërë nga drejtori i policisë së Prizrenit Nexhmi Krasniqi, se “Astrit Dehari konsumoi barna, ra në komë dhe vdiq”.
Ministrja e Drejtësisë dhe drejtori i burgut të Prizrenit s’mërziten për dorëheqje
Përveç personave të lartcekur dorëheqje padyshim është dashur të jep edhe ministrja e Drejtësisë, Dhurata Hoxha, e cila ndonëse ka vetëm një kohë të shkurtë që është në këtë post, nga tragjedia që ndodhi duket se ajo nuk e di se çka ndodh në burgjet e vendit, ku të burgosurit po e pësojnë më së rëndi.
Por, ashtu si ministri Hyseni, edhe ministrja Hoxha ka vendosur që të ndjek shembullin e politikanëve të vjetër dhe të ruaj postin e privilegjet dhe të mos dorëhiqet përkundër një tragjedie të madhe.
Dorëheqje është dashur të jap edhe drejtori i shërbimit korrektues në Prizren, sepse në kompetencën e tij bien aspektet teknike të funksionimit dhe të mirëmbajtjes së burgu, por as ai këtë nuk e bëri.
Pse jo për rastin në fjalë dorëheqje është dashur të ofroi edhe kryeministri Isa Mustafa, si kreu i qeverisë, duke parë se një i ri humbi jetën në burg si kohën e regjimit të Millosheviqit.
Mustafa, lëre që nuk i shkon ndërmend të bëj një akt të tillë moral, por me heshtjen e tij deri më tani po tregon se nuk ka fuqi as të largoi nga detyra shtetërore personat që në një mënyrë janë përgjegjës për mos ofrimin e sigurisë në burgje, për çka humbi jetën edhe aktivisti Dehari.
Ndonëse pesë ditët e fundit shumë politikanë në pozitë e opozitë e analistë të vendit kanë kërkuar dorëheqjen e personave të lartcekur, kërkesat e tyre vazhdojnë të mbesin në vesh të shurdhër.
Astrit Dehari vdiq të shtunën në burgun e Prizrenit në rrethana të paqarta dhe autopsia ka treguar se vdekja e tij është shkaktuar nga asfiksia (pengesat në organet e frymëmarrjes). /tesheshi.com/
