Presidenti Thaçi i përcolli të tretën letër kryeministrit ende në detyrë Albin Kurti, që nga partia e tij, pra Vetëvendosja, të sjellë emrin e një mandatari të ri për formimin e një qeverie të re.
Siç dihet, Kurti është rrëzuar me mocion votëbesimi, por vijon në detyrë pasi i ka gjetur vetes arsyetime kushtetuese, e njëherësh pret të shpallen zgjedhje të reja.
Por Thaçi pretendon se është në të drejtën e tij kushtetuese të kërkojë emër tjetër për një qeveri tjetër.
“Si President i Republikës së Kosovës do të ndërmarr këtë veprim duke ndjekur të gjithë hapat kushtetues që qytetarët e Republikës së Kosovës të kenë sa më shpejtë Qeverinë e tyre të re, sidomos në këtë situatë të pandemisë e cila kërkon një qeveri efikase dhe efektive me mandat të plotë kushtetutes”, shkruan kreu i shtetit të Kosovës.
Por më pas, në pjesën e dytë të letrës, gjuha e Thaçit ndryshon; ajo bëhet paralajmëruese.
“Unë ju siguroj se brenda një periudhe të arsyeshme kohore, në përputhje me urgjencën për t’i dhënë vendit qeveri të re me legjitimet nga Kuvendi i Republikës së Kosovës do të propozojë kandidatin/en për kryeministër për të formuar Qeverinë”, ka shkruar Thaçi.
Kjo letër e tretë, e ky paralajmërim në të, bëhet ndërkohë që LDK është gati të lidhe koalicion me AAK-në e disa parti të tjera, për të shkuar drejt formimit prej tyre të një qeverie të re, duke ia pamundësuar kështu Kurtit që të vijojë ushtrimin e pushtetit ekzekutiv. /tesheshi.com/
