Siç i takon me ligj, kreu i parlamentit maqedonas, Trajko Veljanoski nënshkroi vendimin për shpalljen e zgjedhjeve të parakohshme që do të mbahen më 11 dhjetor të këtij viti.
“Maqedonia do të hyjë në një periudhë të ndërlikuar të shtimit të aktiviteteve të partive politike, e cila besoj se do të kalojë në një atmosferë dinjitoze dhe do të kulmojë me zgjedhjet e 11 dhjetorit, atëherë kur do të zgjidhen përfaqësuesit e popullit të cilët do të jenë përbërja e nëntë e legjislativit të Maqedonisë.
Duke pasur parasysh atë që është thënë, dëshiroj ta ndaj bindjen time të thellë se edhe gjatë kësaj periudhe parazgjedhore atdheu ynë do të japë provimin demokratik për pjekurinë dhe do të ngjitet në një nivel të ri kualitativ që paraqet qëllimin kryesor për të gjitha subjektet politike.
“Sinqerisht besoj se në dy muajt e ardhshëm të gjithë ne të cilët do të angazhohemi për zgjedhjet e 11 dhjetorit para nesh do të kemi ditën kur më pas përsëri do të duhet të ulemi dhe së bashku të vazhdojmë atje ku u ndalëm paraprakisht”, deklaroi Veljanoski.
Maqedonia shkon në këto zgjedhje pas dështimit dy herë të organizimit të tyre, në prill dhe qershor. Në këto ët fundit, pothuajse të gjitha partitë u tërhoqën nga gara dhe tani është “e treta e vërteta”, më 11 dhjetor.
Prej më shumë se dy vitesh, Maqedonia po kalon një krizë të rëndë politike dhe anulimi i dy palë zgjedhjeve, është treguesi më i qartë i amullisë që ka pllakosur këtë vend. /tesheshi.com/
