E ashtuquajtura “trojka” i ka dhënë Greqisë 289 miliardë euro hua në tre raste, duke kërkuar masa shtrënguese për të përmirësuar financat publike dhe për të mbushur arkën e shtetit.
Pas dymbëdhjetë vitesh mbikëqyrje nga Komisioni Evropian, ka ardhur një “ditë historike për Greqinë dhe grekët” që po kthejnë një faqe të re, njoftoi të shtunën kryeministri Kyriakos Mitsotakis.
“Cikli 12-vjeçar që solli dhimbje për banorët grekë, ngadalësoi ekonominë dhe ndau shoqërinë po i vjen fundi”, tha kryeministri konservator.
“Përpara nesh është një horizont i ri rritjeje, uniteti dhe prosperiteti”, shtoi ai.
Në vitin 2010, në kohën e situatës së vështirë financiare të vendit, qeveria greke iu drejtua për ndihmë Bashkimit Evropian, Bankës Qendrore Evropiane dhe Fondit Monetar Ndërkombëtar, raporton France Presse.
E ashtuquajtura “trojka” i ka dhënë Greqisë 289 miliardë euro hua në tre raste, duke kërkuar masa shtrënguese për të përmirësuar financat publike dhe për të mbushur arkën e shtetit.
Athina uli pensionet dhe pagat, rriti taksat, ndaloi punësimin publik, uli buxhetet e administratave, spitaleve dhe organeve publike.
Raundi i tretë i ndihmës përfundoi në vitin 2018, por Komisioni Evropian më pas nisi monitorimin e shtuar të ekonomisë greke për të kontrolluar zbatimin e reformave.
Athina u zotua gjithashtu të mbajë një suficit buxhetor prej 3.5 përqind derisa borxhi të shlyhet.
“Greqia është një vend tjetër sot,” tha Mitsotakis.
“Kemi rritje të fortë dhe rënie të ndjeshme të papunësisë prej tre për qind nga viti i kaluar dhe pesë për qind nga viti 2019”, shtoi Mitsotakis.
KE-ja e Greqisë parashikon një rritje të PBB-së prej 4 për qind këtë vit, ndërsa eurozona do të rritet mesatarisht me 2.6 për qind.
Papunësia në Greqi mbetet ndër më të lartat në eurozonë, paga minimale është më e ulëta dhe një borxh publik prej 180 për qind mbetet një barrë për ekonominë. /tesheshi.com/
