Roma, qyteti i përjetshëm, është sulmuar, pushtuar dhe plaçkitur shumë herë që nga themelimi i saj gati 2800 vjet më parë.
Çdo sulm la plagë në të gjithë qytetin, megjithatë, sipas CNN, degradimi modern po zemëron qytetarët në një nga qytetet më të bukura në botë.
Pushtimi aktual i kryeqytetit italian vjen në formën e e-skuterëve, më shumë se 14 mijë prej tyre, mjete moderne qarkullimi që, sipas shumëkujt aty, bllokojnë trotuaret, acarojnë shoferët, madje dhe vrasin në raste te veçanta.
Që kur skuterët me qira u prezantuan tre vjet më parë si një alternativë ndaj transportit publik gjatë pandemisë Covid, katër njerëz janë vrarë prej tyre.
Shërbimet e urgjencës së qytetit po trajtojnë të paktën një dëmtim të rëndë të shkaktuar nga një skuter çdo tre ditë, thonë autoritetet shëndetësore.
Megjithatë, vetëm dy për qind (rreth 270) të skuterëve me qira përdoren në baza ditore.
Bashkia e Romës u ka dhënë licenca shtatë kompanive për lëvizjen e skuterëve në zona me trafik të lartë dhe shërbimet ndaj tyre.
Skuterët që nuk janë në përdorim janë sfida më e madhe, veçanërisht për personat me aftësi të kufizuara.
Ndërsa Giuliano Frittelli, udhëheqësi i Unionit Italian të të Verbërve lëviz me bastunin e tij, dhjetëra skuter gjenden në trotuarin pranë zyrës së tij në qendër të qytetit dhe ai thotë se ky një kurth vdekjeje për të verbrit.
“Problemi i parë është parkimi i egër,” thotë Frittelli ndërsa godet shkopin e tij në bazën e skuterit, duke shpjeguar se forma e tyre e pazakontë përbën gjithashtu një rrezik për dikë me shikim të dëmtuar që pengohet mbi ta.
Ai gjithashtu thotë se për shkak se janë me rrymë, janë shumë të qetë, gjë që është një kërcënim për ata që nuk shohin.
“Nuk mund t’i dëgjosh, kështu që nuk mund të rruhesh prej tyre,” thotë Frittelli.
Grupi i Frittelli-t po bashkëpunon me Bashkinë e Romës për një projekt që do t’i detyronte përdoruesit e skuterave që të parkonin vetëm në vende të caktuara. Ai gjithashtu dëshiron që ato të përshtaten për të prodhuar një nivel zhurme prej të paktën 30 decibel, në mënyrë që kjo të shërbejë si një paralajmërim për afërsinë e tyre.
Ai thotë se nuk janë vetëm personat me aftësi të kufizuara, përfshirë edhe ata me karrige me rrota, që kanë vështirësi të përdorin rrugën kur trotuaret janë të mbushura me skuter. Edhe të moshuarit apo prindërit që shtyjnë karroca fëmijësh janë të prekur gjithashtu.
Eugenio Patane, një këshilltar trafiku në Bashkinë e Romës, i tha CNN se nga 1 janari 2023, qyteti do të rinovojë licencën për vetëm 9,000 skuter dhe do të zvogëlojë numrin e kompanive që lejohen t’i japin me qera.
“Ato janë një rrezik për njerëzit, por janë gjithashtu një problem për qytetin, për bukurinë e qytetit. Qendra e qytetit është nën mbrojtjen e UNESCO-s dhe është shumë e brishtë, ndaj ne duhet të kujdesemi për të”, thotë Patanè.
Në fillim të qershorit, dy amerikanë u gjobitën me rreth 800 dollarë për ecjen me skuterë në shkallët spanjolle, duke shkaktuar rreth 26,000 dollarë dëme në mermerin e brishtë.
E-skuterët përdoren kryesisht nga turistët dhe të rinjtë, thotë Patane.
Dhe rregullat shpesh shpërfillen.
Kontrollet e policisë janë të rralla dhe gjobat janë të rralla për përdoruesit e skuterëve që thyejnë rregullat bazë, sepse është e vështirë të zbatohet rregulli i ndalimit të drejtimit në trotuare kur skuterët parkohen kryesisht në trotuare.
Por ato duket se janë një hit mes turistëve.
“Të ecësh përreth, veçanërisht rreth qendrës historike ku është pothuajse e pamundur me një makinë, është një përvojë,” i tha CNN Walter Hughes nga Dallas, Teksas.
“Për atë rreze prej dy ose tre kilometrash, nuk mund të gjeni vend parkimi për një makinë, është shumë nxehtë për të ecur për pesë orë dhe e-skuterët janë një zgjidhje e shkëlqyer”, tha ai.
Megjithatë, jo të gjithë janë dakord. Shoferët e taksive, të cilëve u është dashur të kalojnë këmbësorët dhe motoçikletat për vite, thonë se e-skuterët janë një problem shumë më i madh.
Por jeta në qytetin e përjetshëm nuk ka qenë kurrë veçanërisht e lehtë në 2800 vitet e tij. Roma nuk u ndërtua në një ditë, siç thonë ata. Dhe problemet e tij nuk do të zgjidhen brenda një dite. /tesheshi.com/
