Zv/ministrja e Shëndetësisë Mira Rakacolli, dha detaje mbi humbjen e parë njerëzore nga koronavirusi në Shqipëri. Fjala është për një 79-vjeçare nga Durrësi, e cila u shua në ambientet e spitalit të këtij qyteti.
“Pacientja që ndodhej e izoluar në Durrës nuk mundi të mbijetoj si pasojë e komplikacioneve të rënda si pasojë e disa sëmundjeve bashkëshoqëruese kardiake dhe pulmonare.
Konkretisht ishte e sëmurë që vuante nga insufiçenca kardiake e rëndë që në gjuhën mjekësore klasifikohet si NYHA3. Kishte prej shumë vitesh çrregullime të ritmit të zemrës. Kishte sëmundje kronike të mushkërive që në gjuhën mjekësore quhet Spok. Kishte hipertireozë ose një patologji të gjendrës tiroide dhe ishte një e sëmurë që kishtë kryer përpara disa vitesh edhe bajpas kardiak.
Pra, ishte tërësisht në grupin e atyre sëmundjeve të cilët siç ju kemi informuar kur preken nga koronavirusi janë ata që çedojnë më shpejt. Pavarësisht përpjekjeve maksimale që janë bërë nga ana e mjekëve të spitalit të Durrësit për ta mbajtur në jetë, pacientja nuk mundi që të mbijetoj”, tha znj. Rakacolli.
Sipas saj, janë pikërisht moshat e mëdha e të rënduarit me sëmundje prej tyre, ata që riskojnë në rast infektimi. “Ky është një virus që ashtu si gripi prek moshat e mëdha sidomos nga ato mosha që vuajnë nga sëmundejt të tjera kronike”, tha nr.2 i shëndetësisë shqiptare.
Rakacolli sërish këshilloi, sidomos për vetëkarantinim të përkohshëm.
Kushdo që ka një histori udhëtimi me vendet e prekura duhet të vetkarantinohet. Le të kufizojmë lëvizjet sa më shumë të mundemi, kemi nevojë për bashkëpunimin nga të gjithë qytetarët, për parandalimin e koronavirusit”, shton më tej ajo.
Karantinë është një vend ku rrinë qytetarët të shëndoshë por që dyshohet se janë të prekur. Dhe karantinë nuk mund të ketë në ambjente të spitalit. Karantinë ka në ‘Shtëpinë e Pushimit’ ë Ministrisë së Mbrojtjes. Në karantinë mbahen, persona të dyshuar. Vetëkarantinim ti mund ta bësh edhe në shtëpi”, saktësoi zv/ministrja Rakacolli. /tesheshi.com/
