Katër finale të kupave vendore luhen këtë të shtunë në Europë, në ligat kryesore; një mundësi e mirë për të fituar një trofe për skuadra që e kanë patur jo aq pozitiv sezonin.
Luis Enrique ka rastin më të mirë për ta mbyllur me një sukses kapitullin e tij te Barcelona. Finalja në Kupën e Mbretit ndaj Alaves-it ia jep këtë mundësi.
Alaves mund të duket një kundërshtar i lehtë, i mundur në shtëpi 0-6 në La Liga nga katalanasit, por nuk duhet harruar se në “Camp Nou” pati fituar 1-2 më 10 shtator të vitit të shkuar.
Finalja Barcelona – Alaves do të luhet në “Vicente Calderon”, e nis në 21:30.
Chelsea dhe Arsenal-i ndeshen këtë pasdite, në 18:30, në finalen e FA Cup-it. Një derbi londinez që luhet në “Wembley”.
Chelsea sapo ka fituar Premier League-n, ndryshe nga Arsenal-i, që ka vuajtur shumë gjatë këtij sezoni, për të mbetur në fund të tij dhe jashtë Champions League-s për atë pasuesin.
Fitimi i kësaj kupe do t’i zbuste sadopak zemrat e mbështetësve të “topçinjve”, të zemëruar prej kohësh me Arsene Wenger-in.
Eintracht Frankfurt – Borussia Dortmund! Kjo është finalja e Kupës së Gjermanisë, DFB Pokal-it, e cila do të luhet në Berlin, në 20:00.
Dortmund-i ka fituar 3-1 në përballjen e fundit mes tyre, në kampionatin gjerman, më 15 prill.
Kupa e Francës favorizon PSG-në, ngase luhet në Paris, në “Stade de France”. Një tjetër favor për kryeqytetasit është kundërshtari, Angers, i kalueshëm më së paku në letër.
Finalja e orës 21:00 mund të shërbejë për një mbyllje të mirë sezonit të parë të teknikut spanjoll Unai Emery te PSG-ja, në një fushatë që deri tash ka qenë jo aq e shndritshme. /tesheshi.com/
