Në ka rezultat befasues mes ndeshjeve të së shtunës në kampionatet elitare të Europës, është pa dyshim humbja e Liverpulit në fushën e vet ndaj Suonsi Sitit.
Pesë gola të shënuar brenda 45 minutave të dyta në takimin e vlefshëm për javën e 22-të të kampionatit anglez. Llorente shënoi dy gola për udhëtuesit, që morën si përgjigje dy golat e Firmino-s. Sigurdsson i dha fitoren 2-3 Suonsit me golin e tij në një pasdite të paharruar në “Anfield”.
Për Liverpulin kjo qe humbja e tretë në kampionat; në vend të tretë ende, me 45 pikë.
Përndryshe, Mançester Junajtedi iu shmang në sekondat e fundit një humbjeje në fushën e Stouk Sitit. Në barazimin 1-1, të dy golat mbajnë firmën e lojtarëve të Mançesterit. Mata shënoi autogol në minutën e 19-të, Rooney u bë shpëtimtari me një gol të minutës së 94-t.
Në La Ligën spanjolle, Reali mori frymë thellë kur i la pas dy humbjet e fundit me një fitore disi të vuajtur ndaj Malagës.
Për mirë a për keq, protagonisti te Reali është vetëm një: Sergio Ramos! Mbrojtësi i shënoi të dy golat për Realin në fitoren 2-1.
Malaga u kthye në lojë me ngushtimin e rezultatit në nisje të 30 minutave të fundit, por nuk mundi të bënte më shumë se kaq, edhe pse karshi kishte një kundërshtar jo fort bindës.
Në Bundesligë, Borusia e Dortmundit fitoi 1-2 në fushën e Verder Bremenit. Mërgim Mavraj e nisi me humbje aventurën e re te Hamburgu. Skuadra e tij humbi 1-0 ndaj Volfsburgut, duke e bërë dhe më kritike gjendjen në klasifikim.
Në Francë, Paris Sent-Zhërmeni fitoi 0-2 në transfertën ndaj Nantës, me dy gola të Cavani-t. Skuadra kryeqytetase u ngjit në kuotën e 45 pikëve, po aq sa ka dhe Monako, që nuk e ka luajtur ende ndeshjen e saj. Vetëm një pikë e ndan PSG-në nga Nisa e vendit të parë. /tesheshi.com/
