Esma Esad, bashkëshortja e shefit të regjimit sirian, ka dhënë një intervistë për televizionin Russia 24, e para gjatë shumë viteve.
Në intervistën e zhvilluar në anglisht, ajo ka pohuar se ka patur oferta për azil nga kundërshtarët e Beshar Esadit, e se nuk i ka pranuar ato.
“Po, më është ofruar mundësia për të ikur nga Siria. Këto oferta përfshinin garanci sigurie dhe mbrojtje për fëmijët e mi, madje dhe siguri financiare,” i ka thënë ajo gazetares ruse.
Dhe shpjegimi i saj për oferta për azil ka qenë i tillë: “Ishte një përpjekje e qëllimshme për të thërrmuar besimin e njerëzve te presidenti i tyre.”
Gjatë bisedës televizive, Esma Esad i ka dënuar sanksionet perëndimore ndaj Sirisë, si dhe mbulimin e konfliktit sirian nga media perëndimore.
Ajo u martua me Beshar Esadin në dhjetor të vitit 2000. Me shtetësi britanike dhe siriane, e lindur dhe e rritur në Londër, Esma Esad i ka qëndruar pandërprerë në krah të shoqit gjatë krizës: “Kam qenë këtu që nga fillimi, dhe kurrë nuk kam menduar të jem diku tjetër.”
Paraqitja e saj e fundit mediatike ka qenë pesë vite më parë te revista Vogue, nën titullin “Një trëndafil në shkretëtirë”.
Intervista e bashkëshortes së Beshar Esadit vjen pikërisht në kulmin e ofensivës së forcave qeveritare siriane në Halep. /tesheshi.com/
