Një super Shqipëri ka fituar ndaj Rumanisë.
1-0! 1-0! 1-0!
Nuk është vetëm rezultati, është loja, shpirti i lënë në fushë, kilometrat e bëra, sakrifica e pakufi! Më e bukura lojë që ka bërë Shqipëria prej shumë kohësh, më bindësja lojë që ka bërë Shqipëria prej shumë kohësh.
Eshtë Armando Sadiku, që më në fund ka prishur një agjërim të gjatë të sulmit të përfaqësueses kuqezi, që ka tundur rrjetën e rumunëve. Eshtë Memushaj, që sonte ka treguar klas të pafund në lojën e tij. Eshtë Mavraj, që veç një loje fantastike në mbrojtje ka tentuar të shënojë disa herë e ka qenë pranë golit.
Berisha, Ajeti, Hysaj, Agolli janë siguria e një mbrojtje që sonte më shumë kurrë tjetër ka qenë solide.
Basha, Abrashi, Lenjani e Lila në mesfushë kanë bërë gjithçka mirë, duke ndërtuar një mur para mbrojtjes të pakapërcyeshëm, e duke çarë përpara.
Për të ardhur tek Odise Roshi, që i ka dhënë frymëmarrjen aq të nevojshme ekipit në minutat e fundit me depërtimet e tij në të majtë. Te Bala që ka vrapuar si i marrë në aq minuta sa ka qenë në fushë. E te Loriku, i pritur mes ovacionesh. Cana që mbetet kapiten, edhe pse pa shiritin në krahë!
Ka shkruar historinë Shqipëria! Goli i parë në një Europian, fitorja e parë në një Europian!
E tani presim edhe një dhuratë, të shkojmë më tutje. E duam fort këtë gjë.
Do duhet të presim dhjetë ndeshjet në grupet e tjera për të mësuar fatin e përfaqësueses. Sido që të jetë, sido që të shkojë, Shqipëria është vërtet surpriza e Euro 2016-tës!
Faleminderit kombëtare! /tesheshi.com/
