Shkencëtarët kanë gjetur gjurmë të pluhurit kozmik në çatitë e ndërtesave në Paris, Oslo dhe Berlin, e kjo nuk është herë e parë që shkencëtarët konfirmojnë zbulimin e këtyre thërrmijave të vogla në mjediset urbane.
Pluhuri Kozmik është emri që i është dhënë materies së vogël në hapësirë, përfshirë ato që janë lënë që nga formimi i Sistemit Diellor rreth 4.6 miliard vjet më parë. Kërkimet e reja tregojnë se këta mikrometeorë vazhdojnë akoma të bien në tokë edhe miliarda vite më pas.
“E kemi ditur që në vitet 1940 që pluhuri kozmik vazhdon të bjerë në atmosferë,” tha shkencëtari Matthew Genge, i Imperial College në Londër, duke shtuar se: “deri tani kemi menduar se nuk ishte e mundur që të zbulohej në mesin e miliona pjesëve të vogla që gjenden në tokë, me përjashtim të mjediseve ku nuk ka fare pluhur, si Antarktida.”
Por, pasi shkencëtarët kanë analizuar rreth 300 kg sedimente të mbledhura nga çatitë e tre qyteteve europiane kanë arritur të zbulojnë rreth 500 pjesë të vogla.
Pluhuri kozmik përmban minerale magnetike, e për këtë arsye ekipi i shkencëtarëve arriti t’i ndante nga pjesa tjetër duke përdorur magnetë.
Ky zbulim është me rëndësi pasi mundëson rindërtimin e historisë gjeologjike të Sistemit Diellor. Zbulimi i publikua më pas në revistën e specializuar Geology./tesheshi.com/
