Nga Ermir Hoxha
Afro një muaj më parë, çifti mbretëror britanik, princi Çarls dhe bashkëshortja, Kamila, ndërrmorën një tur vizitash në Ballkan, ku qenë dhe në Kosovë.
Por, nëse në disa prej vendeve që vizitoi gjithçka vijoi në mënyrë protokollare dhe korteziale, pra pa asnjë lloj suprize, në Mal të Zi nuk ishte kështu.
Atje, ishte një shqiptar i Ulqinit që e bëri Çarlsin e Kamilën që dilnin paksa nga protokolli, gjë që u pasqyrua fuqishëm dhe në mediat vendase, por jo në ato shqiptare që gati-gati nuk kanë qenë fare të informuara mbi suprizën që u rezervoi shqiptari miqve të veçantë të Backingam Pallas-it nga Britania e Madhe, gjë që nuk i shpëtoi as Al Jazeera-s.
“Fatmir Sadiku përgatit dhuratën për princin, vajin prej trungut 1 mijëvjeçar”, “Kamila e befasuar nga vaji” – ishin këto disa nga titujt e gazetave malazeze që pasqyruan atë çfarë ndodhi në panairin agrokulturës organizuar nga Ministria e Bujqësisë e Malit të Zi për ndër të çifti mbretëror.
Sipas protokollit, askush prej të pranishmëve në panair, prodhues e fermervë, nuk do i zgjatnin dorën çiftit e as që do flsnin; ata thjesht do qëndronin para produkteve të tyre.
Dhe gjithçka shkoi sipas kësaj etike protokollare deri në çastin kur Çarlsi e Kamila shqyen sytë para produkteve të prezantuara nga shqiptari Fatmir Sadiku, vaj nga një trung ulliri 1 mijëvjeçar, si dhe punime artizanale nga druri i ullirit.
Por gjithçka u përqëndrua tek vaji, ku si Çarlsi e Kamila, jo vetëm shtrënguan duart me shqiptarin e u fjalosën me të, por dhe e prodhuan aromën e më pas shijen e vajit, madje duke ngjyer dhe ca krodhe bukë në të, të cilat Fatmiri thotë se i kish marrë kasten, së bashku me disa gota, pikërisht duke menduar që mund të vijë një situatë e tillë.
Dhe ajo çfarë kanë shijuar miqtë e veçantë britanikë, ka qenë vërtet një përjetim i rrallë gastronomik. Ata janë shprehur se një vaj të tillë nuk kanë mundur të shijojnë në jetën e tyre dhe as ta imagjinojnë se mund të ekzistojë.
Dhje ky incident i këndshëm protokollar, ka qenë ajo çfarë ka zënë hapësirat e faqeve të shtypit vendas të nesërmen e vizitës. Ndërkohë, Fatmir Sadiku thotë se vetëm mediat serbe, ato që gjithnjë janë prezente në pasqyrimin e eventeve të shumta në Malin e Zi, me zorr e kanë gëlltitur faktin që një shqiptar të bëjë për vete çiftin mbretëror, duke i detyruar këta të fundit që të parët të shkelin protokollin, për të shijuar vajin e rrallë që del nga mjeshtëria e një shqiptar, në një qytet shqiptarësh si Ulqini.
Fatmir Sadiku njihet si një ndër njohësit më të mëdhenj të të fshehtave të drurit të ullirit, artizan i shumë produkteve të dala nga ulliri, si dhe gjithashtu një nga prodhuesit më cilësor të vajit të ullirit në rajon, prej të cilit numëron dhe shumë çmime të marra në panaire botërore. /tesheshi.com/
