Një grua në qytetin finlandez të Oulus papritur mori një email nga policia, që detajonte rregullat e sigurisë për vizitën zyrtare të Vladimir Putinit në korrik, njoftuan mediat lokale.
Email-at duhej të shkonin te shefi i policisë, por përfunduan në inbox-in e një gruaje, banore lokale, e quajtur Minna Timonen.
Ato përfshinin kohën e saktë të mbërritjes së Putinit me helikopter në aeroportin Savonlinna, si dhe lëvizjet e sakta të presidentit finlandez Sauli Niinisto.
“Të dy helikopterët janë në ajër dhe pritet të ulen në orën 13:37 dhe 13:38. Nuk ka informacion për helikopterin e tretë”, shkruante një nga mesazhet, raportoi gazeta Iltalehti.
Në fillim, Minna mendoi se mund të ketë qenë spam ose junk mail, por më pas ajo vuri re se adresat e e-mail-it përfundonin me një “poliisi.fi” zyrtare.
“Unë fillova të hetoj në Google dhe gjeta se ato emra ishin nga policia”, i tha ajo Iltalehti-t. “Unë nuk kam kurrëfarë lidhje me policinë, dhe nuk mund të kuptoj se si email-at përfunduan në adresën time të hotmail-it, tha ajo.
Rrjedhja e e-mail-ave u konfirmua edhe nga zëdhënësi i policisë, Arto Tynkkynen. “Mesazhet u dërguan në e-mail-in e civiles pas orës 21:00, rreth 9 orë pas mbërritjes së Presidentit Putin. Kjo do të thotë se nuk ishte ndonjë kërcënim për sigurinë e presidentëve në asnjë moment. Në atë kohë, presidentët tashmë e kishin parë operën në Olavinlinna”, tha Tynkkynen për kanalin e lajmeve Yle.
Rrjedhja e e-mail-it është duke u shqyrtuar nga shefi i policisë së Finlandës, Taisto Huokko, i cili e ka përcjellë hetimin në duart e policisë Häme. “Udhëzimet tona të komunikimit tashmë janë mjaft të mira, sistemet e mesazheve janë të mbrojtura dhe trajnimi është në nivel të lartë”, tha ai, duke shtuar se pas një hetimi do të rishqyrtojnë llojin e mjeteve që do të përdoruren për ngjarje të tilla.
Putin vizitoi qytetin e Savonlinës në juglindje të Finlandës më 27 korrik, me ftesën personale të Presidentit Niinisto. Përveç ndjekjes së operës në kështjellën e afërt Olavinlinna, të dy liderët gjithashtu lundruan së bashku në liqenin Saimaa në një varkë me avull.
Vizita e Putinit simbolikisht erdhi pasi Finlanda festoi 100-vjetorin e pavarësisë nga Rusia. Përkundër mbështetjes së sanksioneve perëndimore kundër Rusisë dhe duke vuajtur pasojat e sanksioneve nga Moska, Finlanda kryesisht mban një qëndrim neutral dhe pragmatik në marrëdhëniet me fqinjin e saj. Vetëm një pakicë e finlandezëve mbështesin aplikimin për anëtarësim në NATO, ndërkohë që shumica e konsideron atë një lëvizje që do të dëmtonte marrëdhëniet me Rusinë dhe rrjedhimisht ekonominë finlandeze. /tesheshi.com/
