Presidenti i Republika Srbska, Milorad Dodik ka paraqitur këtë të martë një kërkesë në ambasadën amerikane në Sarajevë për vizë të zakonshme – normale, pasi atij i është mohuar ajo diplomatike.
“Për arsye procedurale më herët kam aplikuar për vizë diplomatike, por kërkesa ime është refuzuar me arsyetimin se nuk i përfaqësoj autoritetet e Bosnjë-Hercegovinës, dhe se për këtë arsye nuk mund të më lëshohet viza, të cilën më parë e kam marrë rregullisht”, tha Dodik, kreu i serbëve të Bosnjës.
Ai u tha gazetarëve në Sarajevën lindore, se është drejtuar me kërkesë për lëshimin e një vize të rregullt dhe shprehu besimin se ai do ta marrë atë brenda një apo dy ditësh, në mënyrë që të mund të udhëtojë drejt Uashingtonit në gjysmën e dytë të janarit, për të marrë pjesë në një ceremoni jo-zyrtare me rastin e inaugurimit të presidentit të ri të Shteteve të Bashkuara, Donald Trump.
Ai shprehu bindjen se ai do të marrë vizën, sepse beson se politika të cilën e ndjek ai, është konform respektimit të Marrëveshjes së Dejtonit. /tesheshi.com/
