Në historinë e parlamentarizmit shqiptar të pas-’90-ës, u shënua këtë të enjte rasti më i paprecedentë, ku jo mazhoranca por opozita zhvilloi një seancë vetëm me praninë e saj, pasi kreu i Kuvendit e mbylli atë dhe deputetët e shumicës lanë sallën.
Mbetën aty vetëm ata të opozitës, ku njëri pas tjetrit, përfshirë dhe Berishën, dolën në podium me fjalime përkatëse, pa patur nevojë të respektojnë ndonjë minutash apo t’u thirret emri nga drejtuesi i seancës. Gjithçka rrodhi e qetë dhe pa replika, në një mjedis pa kundërshtarë. Gjithçka kumtonin deputetët e opozitës, transmetohej në Facebook-un e PD-së, të kryetarit Basha, por dhe në ndonjë prej televizioneve informative.
Ishte ky i vetmi zhvillim normal në një parlament që nuk gjen qetësi prej ndërrimit të pushteteve para 5 vitesh, e ku PD e ka intensifikuar akoma dhe më shumë betejën e saj për ta mbajtur medoemos të bllokuar. /tesheshi.com/
